کولکاتا 19مارچ کولکتہ کے چت پور میں تیراکی کے ایک انسٹرکٹر پر ایک نابالغ لڑکی کو دھمکانے، اس کے زیورات چھیننے اور اسے قتل کرنے کی کوشش کا الزام عائد کیا گیا ہے۔ الزام ہے کہ 11 سالہ نابالغ کو پہلے اس کے گلے میں تولیہ لپیٹ کر اور پھر گلے میں چھرا گھونپ کر قتل کرنے کی کوشش کی گئی۔ پولیس اس واقعے کے سلسلے میں سوئمنگ انسٹرکٹر کو پہلے ہی گرفتار کر چکی ہے۔ گرفتار شخص کا نام سندیپ ساو ہے۔ پولیس نے اس کے خلاف ڈکیتی اور اقدام قتل سمیت تین دفعات کے تحت مقدمہ درج کر لیا ہے اور تفتیش کر رہی ہے۔پولیس ذرائع کے مطابق یہ واقعہ منگل کی دوپہر کو پیش آیا۔ اس وقت ملزم سوئمنگ انسٹرکٹر چت پور تھانہ علاقہ کے کاشی پور روڈ پر نابالغ کے گھر گیا تھا۔ خاندان کا الزام ہے کہ منگل کی سہ پہر تقریباً 3:15 بجے سندیپ نے ان کے گھر سے زیورات چرائے اور نابالغ کو گلا دبا کر مارنے کی کوشش کی۔ اہل خانہ نے بدھ کو چت پور پولیس اسٹیشن میں شکایت درج کرائی۔ اس شکایت کی بنیاد پر پولیس نے ابتدائی تلاش اور تفتیش شروع کردی۔ ملزم کو گرفتار کر لیا گیا۔ پولیس ذرائع کے مطابق ابتدائی تفتیش کے دوران ملزمان نے واردات کا اعتراف کرلیا۔

Source: Mashriq News service