گائے کو قومی جانور قرار دے کراس کا اکسپورٹ روک دیا جائے : سید سرور چشتی

گائے کو قومی جانور قرار دے کراس کا اکسپورٹ روک دیا جائے : سید سرور چشتی گائے کی اسمگلنگ اور ذبح کے شبہ میں مسلمانوں پر ہجوم کے تشدد (لنچنگ) کے واقعات پر گہری تشویش کا اظہار کرتے ہوئے اجمیر شریف کے مولوی سید سرور چشتی نے گائے کو قومی جانور کا درجہ دینے کا مطالبہ کیا ہے۔ انہوں نے مرکز کی نریندر مودی حکومت سے مزید اپیل کی ہے کہ گائے کو قومی جانور کا درجہ دینے کے ساتھ ساتھ ملک بھر میں گائے ذبح کرنے اور مذہبی تہواروں کے موقع پر قربانی کے لیے گائے کی فروخت پر بھی پابندی لگائی جائے۔ اس کے علاوہ وہ گائے کے گوشت (بیف) کی برآمدات پر بھی مکمل پابندی چاہتے ہیں۔ ملک بھر میں عید الاضحیٰ منائی جانے والی ہے۔ مغربی بنگال میں حال ہی میں ختم ہونے والے اسمبلی انتخابات میں جیت حاصل کر کے بی جے پی کی حکومت بننے کے بعد، عوامی مقامات پر گائے ذبح کرنے پر پابندیاں عائد کی گئی ہیں۔ اس پس منظر میں چشتی جیسے اعلیٰ مذہبی رہنما کی اس اپیل نے ہلچل مچا دی ہے۔ انہوں نے کہا کہ چونکہ ہندووں کے نزدیک گائے کی گہری مذہبی اہمیت ہے، اس لیے اسے مناسب احترام اور آئینی تحفظ ملنا چاہیے۔ انہوں نے وزیر اعظم نریندر مودی سے پارلیمنٹ کا خصوصی اجلاس بلا کر گائے کو قومی جانور کا درجہ دینے کا بل لانے کی اپیل کی۔ چشتی نے کہا کہ یہ جاننا ضروری ہے کہ ایسے بل کی کون حمایت کرتا ہے اور کون مخالفت۔ اس معاملے کو سیاست سے بالاتر ہو کر فرقہ وارانہ ہم آہنگی اور ثقافتی احترام کے نقطہ نظر سے دیکھا جانا چاہیے۔ انہوں نے یہ بھی کہا کہ مسلمان اس طرح کے اقدام کا خیرمقدم کریں گے۔

Source: Social Media