خاتون ٹیچر نے اپنے ایک سابق طالب علم کے خلاف تھانہ میں مقدمہ درج کرایا

اس رپورٹ کے مطابق کولکتہ کے کڑیا تھانے میں ایک خاتون ٹیچر نے اپنے ایک سابق طالب علم کے خلاف گزشتہ 13 سالوں سے مسلسل ہراساں کرنے اور سوشل میڈیا پر نازیبا تبصرے کرنے کے الزام میں مقدمہ درج کرایا ہے۔یہ سلسلہ 2013 میں شروع ہوا جب متاثرہ خاتون ایک اسکول میں عارضی طور پر پڑھاتی تھیں۔ ملزم اس وقت بارہویں جماعت کا طالب علم تھا اور تب ہی سے وہ اپنی استانی کے لیے "مخصوص جذبات" رکھنے کا دعویٰ کرتا تھا۔ اسکول چھوڑنے کے بعد طالب علم نے سوشل میڈیا پر استانی کو فرینڈ ریکوئسٹ بھیجی اور مسلسل نازیبا تبصرے کرنے لگا، جس کے بعد انہوں نے اسے بلاک کر دیا۔ تقریباً تین سال قبل خاتون نے پرانی باتوں کو بھول کر اسے 'ان بلاک' کر دیا اور ایک بڑے کی حیثیت سے اسے زندگی میں آگے بڑھنے کے مشورے دینے لگیں۔ تاہم، نوجوان نے اسے موقع سمجھ کر دوبارہ اپنی نام نہاد محبت کا اظہار شروع کر دیا اور انکار پر فحش زبان اور نازیبا جملوں کا استعمال کرنے لگا۔صورتحال حد سے بڑھ جانے پر خاتون نے تنگ آکر کڑیا تھانے میں بدتمیزی اور ہراسانی کی شکایت درج کرائی ہے۔

Source: PC-sangbadpratidin