الیکشن کمیشن نے برنول اور بورولین تیار رکھنے کو کہا

بنگال میں انتخابی درجہ حرارت اس وقت عروج پر پہنچ گیا جب الیکشن کمیشن کے ایک سوشل میڈیا ہینڈل سے کی گئی ایک غیر معمولی پوسٹ نے سیاسی حلقوں میں کھلبلی مچا دی۔ کمیشن کی جانب سے ووٹرز کو "برنول اور بورولین" تیار رکھنے کا مشورہ دیا گیا ہے، جسے سیاسی ماہرین ترنمول کانگریس کی تنقید کے جواب میں ایک "سخت وارننگ" اور "طنز" کے طور پر دیکھ رہے ہیں۔ جنوبی کولکتہ کے ڈسٹرکٹ الیکشن آفیسر کے سوشل میڈیا پیج پر مادھوری ڈکشت اور عامر خان کی فلم 'دل' کے مشہور گانے کا لنک شیئر کیا گیا:"ہم پیار کرنے والے، دنیا سے نہ ڈرنے والے/ یار جلنے والے کو جلائیں گے..." پوسٹ کے کیپشن میں ووٹرز کو بغیر کسی خوف کے ووٹ ڈالنے کی ترغیب دی گئی، لیکن ساتھ ہی شرپسندوں کو سخت الفاظ میں تنبیہ کی گئی:"تمام ماوں، بہنوں اور بھائیوں سے گزارش ہے کہ بے خوف ہو کر ووٹ دیں۔ غنڈے اور مجرم ہوشیار ہو جائیں۔"اپنے پاس وافر مقدار میں برنول اور بورولین تیار رکھیں، ورنہ (کمیشن کی کارروائی کی) تپش اتنی بڑھے کہ آپ جھلس جائیں گے۔"کمیشن نے مزید کہا کہ اگر کسی نے ووٹنگ میں رکاوٹ ڈالی تو ایسی سخت کارروائی ہوگی کہ برنول اور بورولین بھی کام نہیں آئیں گے۔ سیاسی مبصرین کے مطابق، یہ پوسٹ براہِ راست ترنمول کانگریس کے لیے ایک بالواسطہ جواب ہے: الیکشن کے اعلان کے بعد سے ممتا بنرجی اور ترنمول کانگریس مسلسل الیکشن کمیشن کو نشانہ بنا رہی ہیں۔ پولیس افسران کے تبادلوں اور (ووٹر لسٹ سے ناموں کے اخراج) کے معاملے پر ممتا بنرجی نے چیف الیکشن کمشنر کو خطوط بھی لکھے اور جلسوں میں سخت تنقید بھی کی۔سمجھا جا رہا ہے کہ کمیشن نے اس پوسٹ کے ذریعے نام لیے بغیر حکمراں جماعت کے طنز کا جواب دیا ہے اور یہ پیغام دیا ہے کہ وہ کسی بھی دباو میں آئے بغیر سختی سے نمٹنے کے لیے تیار ہیں۔ جہاں امیدواروں کی جانب سے روٹی بیلنے، مچھلی پکڑنے اور حجامت بنانے جیسی انتخابی مہمات سے لوگ حیران تھے، وہیں الیکشن کمیشن کے اس "فلمی اور طنزیہ" انداز نے سب کو چونکا دیا ہے۔ کچھ لوگ اسے کمیشن کا ایک نیا اور موثر انداز قرار دے رہے ہیں، جبکہ مخالفین اسے غیر ضروری قرار دے رہے ہیں۔

Source: PC-sangbadpratidin