ایک بھی جائز ووٹر فہرست سے باہر نہیں ہوگا‘، ریاست پر برہمی کا اظہار کرتے ہوئے چیف جسٹس کا ’سپریم‘ بھروسہ

کولکاتا10مارچ :: سپریم کورٹ نے ایس آئی آر کے عمل سے متعلق دائر پیشگی درخواست پر سخت برہمی کا اظہار کیا ہے۔ منگل کو اس کیس کی سماعت کے دوران چیف جسٹس سوریا کانت نے ریاست کی وکیل مینکا گرو سوامی سے کہا کہ اس طرح کی پیشگی درخواستیں غلط پیغام دیں گی۔ چیف جسٹس نے وکیل اور ترنمول کی نومنتخب راجیہ سبھا رکن مینکا گرو سوامی کو مخاطب کرتے ہوئے کہا، "اس پیشگی درخواست کے ذریعے یہ پیغام جا رہا ہے کہ آپ کو سسٹم پر بھروسہ نہیں ہے۔" چیف جسٹس نے گرو سوامی کو درخواست واپس لینے کا مشورہ دیتے ہوئے واضح طور پر یقین دلایا کہ کوئی بھی جائز ووٹر فہرست سے خارج نہیں ہوگا۔ ایس آئی آر سے متعلق کیس سپریم کورٹ میں زیرِ سماعت ہے، جس کے دوران پیر کو ریاست نے ایک بار پھر عدالت سے رجوع کیا تھا۔ گزشتہ روز مینکا گرو سوامی نے الزام لگایا تھا کہ "ووٹرز کے نام فہرست سے نکال دیے گئے ہیں اور ان کی دستاویزات ریکارڈ نہیں کی جا رہی ہیں۔ یہ وہ لوگ ہیں جنہوں نے ماضی میں ووٹ ڈالے ہیں، مگر اب ان کے کاغذات قبول نہیں کیے جا رہے ہیں۔" ریاست کی اس نئی درخواست پر سماعت کرتے ہوئے چیف جسٹس نے کہا، "ہائی کورٹ کے چیف جسٹس نے ہمیں بتایا ہے کہ 10 لاکھ ووٹرز کا کام مکمل ہو چکا ہے۔ میں سختی سے کہہ رہا ہوں کہ جوڈیشل افسران پر کسی قسم کا سوال نہ اٹھائیں۔" انہوں نے مزید بھروسہ دلاتے ہوئے کہا، "جوڈیشل افسران تندہی سے کام کر رہے ہیں، جو بھی اصلی ووٹرز ہیں، انہیں فہرست میں ضرور شامل کیا جائے گا۔ ریاست کی نئی اپیل پر برہمی ظاہر کرتے ہوئے چیف جسٹس نے اسے "وقت سے پہلے" قرار دیا اور اسے واپس لینے کا حکم دیا۔ چیف جسٹس نے امید ظاہر کی کہ انتخابات سے قبل یہ کام مکمل ہو جائے گا۔ تاہم، بنچ نے یہ انتباہ بھی دیا کہ "ہم ضرورت پڑنے پر اس درخواست کے تناظر میں توہینِ عدالت کا نوٹس بھی دے سکتے ہیں۔ موجودہ صورتحال میں ہم تمام فریقین کو شک کے دائرے میں رکھ رہے ہیں۔

Source: PC- tv9bangla