ای ڈی کے خلاف سپریم کورٹ میں ترنمول نے کیویٹ داخل کیا

کولکاتا10جنوری : کمرہ عدالت میں زبردست ہنگامے اور غیر معمولی بھیڑ کی وجہ سے ترنمول بمقابلہ ای ڈی کیس کی سماعت ملتوی کر دی گئی۔ انفورسمنٹ ڈائریکٹوریٹ نے جمعہ کو ہائی کورٹ کے کارگزار چیف جسٹس کو ایک ای میل بھیج کر فوری سماعت کی درخواست کی تھی، جسے قبول نہیں کیا گیا۔ اس صورتحال میں ای ڈی نے سپریم کورٹ سے رجوع کیا ہے۔ تاہم، اس سے پہلے ہی مغربی بنگال حکومت کی جانب سے سپریم کورٹ میں کیویٹ داخل کر دی گئی ہے۔ ریاست کی جانب سے یہ کیویٹ اس لیے داخل کی گئی ہے تاکہ اگر ای ڈی سپریم کورٹ پہنچتی ہے، تو عدالت ریاست کا موقف سنے بغیر کوئی یکطرفہ حکم جاری نہ کرے۔ کیویٹ کا مطلب یہ ہے کہ مخالف فریق کو آگاہ کیے بغیر کوئی قانونی کارروائی نہ کی جائے تاکہ وہ اس کا فائدہ نہ اٹھا سکے۔ جمعہ کی دوپہر ڈھائی بجے کولکتہ ہائی کورٹ میں سماعت شروع ہوئی، لیکن عدالت کے اندر اس قدر شور و غل تھا کہ جسٹس شبھرا گھوش کے منع کرنے کے باوجود ماحول پرسکون نہ ہو سکا۔ وکیل کلیان بنرجی نے خود مائیک پکڑ کر سب سے خاموش رہنے کی اپیل کی، لیکن کوئی نتیجہ نہ نکلا۔ اس کے بعد جج نے اعلان کیا کہ کیس کی سماعت 14 جنوری کو ہوگی۔ ای ڈی نے عدالت میں جو درخواست دی ہے اس میں کہا گیا ہے کہ تلاشی کے دوران وزیراعلیٰ خود وہاں موجود تھیں۔ جس طرح وہ فائلیں لے کر گئیں، اسے نوٹس میں لیا جانا چاہیے۔ ای ڈی نے سی بی آئی (CBI) انکوائری کی بھی درخواست کی ہے، کیونکہ انہیں ریاستی پولیس پر بھروسہ نہیں ہے۔ ای ڈی کا الزام ہے کہ واقعے کے دن پولیس کی موجودگی میں ہی تمام فائلیں نکالی گئیں۔ دوسری طرف ریاست کا دعویٰ ہے کہ ایجنسی کی تحقیقات میں کوئی رکاوٹ نہیں ڈالی گئی۔

Source: PC- anandabazar