ڈیوٹی میں لاپرواہی برتنے کے الزام میں پر یسی ڈنسی جیل کے سپرنٹنڈنٹ اور کنٹرولر کو معطل کردیا گیا

پریزیڈنسی جیل کے اندر بیٹھ کر ترنمول دور کے بااثر قیدیوں کی جانب سے اسمارٹ فون کے استعمال اور جرائم کا نیٹ ورک چلانے کے خلاف وزیر اعلیٰ شبھیندو ادھیکاری نے سخت کارروائی کی ہے۔ جیل کے اندر کے اس بدعنوان گٹھ جوڑ کو توڑنے کے لیے انہوں نے سی آئی ڈی تحقیقات کا حکم دیا ہے۔فرائض میں غفلت برتنے اور قیدیوں کو غیر قانونی سہولیات فراہم کرنے کے الزام میں پریزیڈنسی جیل کے سپرنٹنڈنٹ این کوجور اور چیف کنٹرولر دیپتو گھرائی کو معطل کر دیا گیا ہے۔ریاستی پولیس کے ڈی جی اور کولکتہ پولیس کے ڈی سی ساوتھ کے مشترکہ آپریشن میں جیل کے اندر سے کئی اسمارٹ فون قبضے میں لیے گئے ہیں۔ جیل کے اندر کس کے نام پر سم کارڈ استعمال ہو رہے تھے اور موبائل فون اندر کیسے پہنچے، اس کی مکمل جانچ کی ذمہ داری سی آئی ڈی کو سونپ دی گئی ہے۔ جمعہ کے روز نوانّہ (سیکریٹریٹ) میں صحافیوں سے گفتگو کرتے ہوئے شبھیندو ادھیکاری نے کئی اہم انکشافات کیے: ان کا الزام ہے کہ سابقہ ترنمول حکومت کے تعاون یا شدید لاپرواہی کی وجہ سے شاہجہاں جیسے قیدی برسوں سے جیل کے اندر بیٹھ کر مجرمانہ نیٹ ورک چلا رہے ہیں۔ شبھیندو نے کہا، "یہ روایت ایک دن کی نہیں بلکہ برسوں پرانی ہے۔ نیچے سے اوپر تک بدعنوانی کا جو گٹھ جوڑ بنا ہوا ہے، اسے توڑنے میں کچھ وقت لگے گا۔" صرف پریزیڈنسی ہی نہیں، بلکہ دمدم سے بہرام پور تک تمام جیلوں میں اس طرح کی غیر قانونی سرگرمیوں کو روکنے اور سپریم کورٹ کی گائیڈ لائنز کے مطابق قیدیوں کو الگ سیل میں منتقل کرنے کی ہدایت دی گئی ہے۔

Source: PC-tv9bangla