کولکتہ10جنوری: وزیراعلیٰ ممتا بنرجی کے الزامات کے بعد کولکتہ پولیس تحقیقات میں سرگرم ہوگئی ہے۔ پولیس نے پرتیک جین کے گھر اور آئی پیک (I-PAC) کے دفتر سے دستاویزات کی چوری میں 'ملزم' ای ڈی (ED) حکام کی شناخت کا عمل شروع کر دیا ہے۔ دونوں مقامات پر موجود مرکزی فورسز کے جوانوں اور افسران کی بھی شناخت کی کوشش کی جا رہی ہے۔ اسی سلسلے میں آج ہفتہ کی صبح شیکسپیئر سرانی تھانے کے پولیس افسران آئی پیک کے سربراہ پرتیک جین کے گھر پہنچے، جہاں سے تمام سی سی ٹی وی (CCTV) فوٹیج اور ڈی وی آر (DVR) قبضے میں لے لیے گئے ہیں۔ ساتھ ہی پرتیک جین کے گھر کی ملازمہ اور سیکورٹی اہلکاروں کے بیانات بھی ریکارڈ کیے گئے ہیں۔شناخت کے بعد ملزمان کو نوٹس بھیجنے کا عمل شروع کیا جائے گا۔پولیس کے ساتھ بدسلوکی کے الزامات: تحقیقات میں یہ بات سامنے آئی ہے کہ ای ڈی کے افسران نے جمعرات کی صبح سوا چھ بجے تلاشی شروع کی تھی، لیکن اس کے تقریباً پانچ گھنٹے بعد کولکتہ پولیس کو ای میل کے ذریعے اطلاع دی گئی۔ اطلاع ملنے پر جب ڈی سی (ساوتھ) سمیت پولیس افسران وہاں پہنچے اور ای ڈی حکام سے بات کرنے کی کوشش کی، تو الزام ہے کہ ای ڈی اور سی آر پی ایف (CRPF) نے پولیس کے ساتھ دھکم پیل کی اور مرکزی فورسز کے جوانوں نے لاٹھیاں تان کر پولیس افسران کو ڈرانے کی کوشش کی۔
درج کیے گئے مقدمات کی تفصیلات: پولیس ذرائع کے مطابق، وزیراعلیٰ کی شکایت پر شیکسپیئر سرانی اور الیکٹرانک کمپلیکس تھانے کی پولیس نے ترنمول کی انتخابی دستاویزات کی چوری کی تحقیقات شروع کر دی ہے۔وزیراعلیٰ کا الزام ہے کہ آئی پیک کے دفتر اور پرتیک جین کے گھر میں ترنمول کانگریس کی الیکشن سے متعلق اہم پارٹی دستاویزات اور ڈیجیٹل ڈیٹا موجود تھا، جسے نامعلوم ای ڈی اور سی آر پی ایف حکام نے چوری کیا اور آن لائن منتقل کر دیا۔
شیکسپیئر سرانی تھانے نے اپنی طرف سے بھی ایک شکایت درج کی ہے، جس میں کہا گیا ہے کہ ای ڈی نے مقامی تھانے کو مطلع کیے بغیر تلاشی لی۔ جب پولیس کے ایک سارجنٹ نے وہاں پہنچ کر سرچ وارنٹ اور شناختی کارڈ مانگا، تو انہیں نہ صرف روکا گیا بلکہ دھکا بھی دیا گیا۔ اس کے بعد جب ڈی سی (ساوتھ) پریہ برت رائے اضافی فورس کے ساتھ پہنچے، تو ان کے ساتھ بھی بدتمیزی کی گئی۔ ای ڈی نے تلاشی کی وجہ بتانے والی ای میل صبح 11 بجے کے بعد بھیجی۔ اس صورتحال کی اطلاع ملتے ہی پولیس کمشنر منوج ورما خود موقع پر پہنچے، لیکن انہیں بھی اندر جانے کی اجازت نہیں دی گئی۔