ڈاکٹروں کی مالی حفاظت کے لیے کولکتہ میں کانفرنس

کولکاتا23دسمبر:ڈاکٹر چوبیس گھنٹے عوام کی طبی خدمت میں مصروف رہتے ہیں۔ رات کے کسی بھی پہر جب کوئی بیمار ہوتا ہے، تو ڈاکٹروں کو ہی پکارا جاتا ہے۔ لیکن ستم ظریفی یہ ہے کہ جب کسی مریض کی حالت بگڑتی ہے یا اس کی موت واقع ہو جاتی ہے، تو سب سے پہلے اسی ڈاکٹر کو کٹہرے میں کھڑا کر دیا جاتا ہے جس نے جان بچانے کے لیے اپنی پوری طاقت لگا دی ہوتی ہے۔ یہ صورتحال ڈاکٹروں کے لیے ایک بڑا خطرہ بن چکی ہے، جو نہ صرف جسمانی اور ذہنی بلکہ بعض اوقات ان کی مالی حفاظت کو بھی شدید متاثر کرتی ہے۔ ڈاکٹروں کے مفادات کے تحفظ کے لیے شہر میں ’ہیلتھ اینڈ ویلتھ فورم‘ (Health and Wealth Forum) کا انعقاد کیا گیا۔ اس موقع پر کولکتہ کے ممتاز مالیاتی مشیر سجل رائے اور معروف ماہرِ معاشیات نتن گوئل نے ڈاکٹروں کو قیمتی مشورے دیے۔ ڈاکٹروں کو سمجھایا گیا کہ وہ کس طرح مختلف شعبوں میں مناسب اور فائدہ مند سرمایہ کاری (Investment) کر کے اپنا اور اپنے خاندان کا مستقبل محفوظ بنا سکتے ہیں۔ حالیہ دنوں میں سرکاری اور نجی ہسپتالوں میں مریض کی موت کے بعد اہلخانہ کی جانب سے توڑ پھوڑ اور احتجاج کے واقعات میں اضافہ ہوا ہے۔ اکثر صورتوں میں طبی غفلت (Negligence) کا الزام لگا کر ہسپتالوں کی املاک کو نقصان پہنچایا جاتا ہے۔بہت سے معاملات میں تحقیقات کے بعد طبی غفلت کا کوئی ثبوت نہیں ملتا اور یہ ثابت ہوتا ہے کہ ڈاکٹروں نے اپنی بہترین کوشش کی تھی۔لیکن تب تک ڈاکٹر کو سماجی، جسمانی اور ذہنی ہراسانی کا سامنا کرنا پڑ چکا ہوتا ہے۔اس فورم کا بنیادی مقصد ان چیلنجز کے درمیان ڈاکٹروں کو مالی طور پر اتنا مستحکم کرنا ہے کہ وہ کسی بھی ناگہانی صورتحال یا قانونی پیچیدگیوں کے دوران اپنی اور اپنے پیشہ ورانہ وقار کی حفاظت کر سکیں۔

Source: PC- sangbadpratidin