Kolkata

دو لاکھ کروڑ کے بقایاجات کا الزام درست ہے؟ بھوپیندر کا واضح جواب کے بجائے جوابی حملہ

107

11/02/26

کولکاتا11فروری :مغربی بنگال کی وزیر اعلیٰ بار بار یہ الزام لگاتی رہی ہیں کہ مرکزی حکومت نے ریاست کے واجب الادا 2 لاکھ کروڑ روپے روک رکھے ہیں۔ حال ہی میں ترنمول لیڈر ابھیشیک بنرجی نے بھی اس معاملے پر آواز اٹھائی ہے۔ مرکز اور بی جے پی کی جانب سے اب تک یہ دلیل دی جاتی رہی ہے کہ ریاست بھیجے گئے فنڈز کا حساب (Utilisation Certificate) نہیں دیتی، لیکن مرکزی وزیر بھوپیندر یادو نے اس بار ایک مختلف رخ اختیار کیا۔بدھ کے روز کولکتہ میں مرکزی بجٹ کی وضاحت کرتے ہوئے جب ان سے وزیر اعلیٰ کے الزامات کے بارے میں سوال کیا گیا، تو انہوں نے براہِ راست تردید کرنے کے بجائے ممتا بنرجی پر جوابی وار کیا۔ مرکزی وزیر نے طنز کرتے ہوئے کہا کہ:"جو شخص واجب الادا رقم کی شکایت کر رہا ہے، وہی برسوں سے اپنی حکومت کے ملازمین کا جائز حق (ڈی اے) روکے بیٹھا ہے!"
بھوپیندر یادو نہ صرف ملک کے وزیر ماحولیات و جنگلات ہیں، بلکہ بی جے پی کی مرکزی قیادت نے انہیں مغربی بنگال اسمبلی انتخابات کے لیے مبصر (Observer) کی ذمہ داری بھی سونپ رکھی ہے۔ وہ انتخابی تیاریوں کا جائزہ لینے کے لیے گزشتہ پانچ ماہ سے مسلسل بنگال کا دورہ کر رہے ہیں۔ مرکزی حکومت نے ہر ریاست میں ایک وزیر کو بجٹ کی اہمیت واضح کرنے کے لیے بھیجا ہے، اور مغربی بنگال کی ذمہ داری بھوپیندر یادو کو دی گئی ہے۔ اسی سلسلے میں منعقدہ پروگرام کے دوران انہوں نے ریاستی حکومت اور وزیر اعلیٰ پر سخت تنقید کی۔

Source: PC- anandabazar