جنوبی کولکتہ کے گڑیا علاقے میں دن دیہاڑے قتل اور خودکشی کا لرزہ خیز واقعہ

جنوبی کولکتہ کے گڑیا علاقے میں دن دیہاڑے قتل اور خودکشی کا لرزہ خیز واقعہرونما ہوا۔بیوٹی پارلر کے اندر ایک نوجوان نے اپنی مبینہ محبوبہ کو چاقو کے وار کر کے قتل کرنے کے بعد خودکشی کر لی۔ منگل کی دوپہر گڑیا کے تیتول تلا علاقے میں پیش آنے والے اس واقعے سے سنسنی پھیل گئی۔ مقتولہ کی شناخت 50 سالہ روپ بانی داس کے نام سے ہوئی ہے، جو گزشتہ 15 سالوں سے اس بیوٹی پارلر میں بیوٹیشن کے طور پر کام کر رہی تھیں۔ روزانہ کی طرح منگل کی دوپہر بھی ان کے شوہر انوپ کمار داس انہیں بائیک پر پارلر چھوڑ کر گئے تھے، جس کے کچھ ہی دیر بعد انہیں یہ المناک خبر ملی۔ بتایا جا رہا ہے کہ دوپہر تقریباً 12:05 بجے روپ بانی کے شوہر انہیں اتار کر روانہ ہوئے، جس کے فوراً بعد ایک نوجوان پارلر پہنچا۔ وہاں ان دونوں کے درمیان شدید بحث تکرار ہوئی، جس کے بعد اس نے حملہ کر کے خاتون کو قتل کر دیا اور پھر خود کی زندگی بھی ختم کر لی۔ دوپہر 12:45 بجے جب شوہر کو فون پر اطلاع ملی کہ پارلر میں جھگڑا ہو رہا ہے، تو وہ فوراً اپنے ایک رشتہ دار کے ساتھ بائیک پر واپس پہنچے، لیکن تب تک پارلر کا فرش خون سے لت پت تھا اور لوگوں کا ہجوم جمع ہو چکا تھا۔

Source: PC- anandabazar