دلیپ، شبھیندو اور متھن کو لانے کے باوجود بی جے پی کی 'پریورتن یاترا' میں بھیڑ غائب

کولکاتا6مارچ :ریاست بھر میں بی جے پی کی 'پریورتن یاترا' جاری ہے، لیکن یاترا کے راستے میں لوگ کہاں ہیں؟ یہ سوال بی جے پی قیادت کو پریشان کر رہا ہے۔ خاص طور پر دوسرے ریاستوں کے ہائی پروفائل لیڈروں اور وزرائے اعلیٰ کو بلا کر تقریریں کروانے کے باوجود میدان نہیں بھر پا رہے۔ یہی حال اداکار اور پارٹی کی قومی مجلس عاملہ کے رکن متھن چکرورتی، ریاستی صدر شمیک بھٹاچاریہ، سابق صدر دلیپ گھوش اور شبھیندو ادھیکاری کے جلسوں کا ہے۔ چاہے وہ کولکتہ کا قلب رانی راسمنی ایونیو ہو یا آمتا، لال گڑھ اور بونگاوں۔ کولکتہ کے جلسے میں لوگوں کی کمی کے خدشے کے پیش نظر متھن چکرورتی شریک ہی نہیں ہوئے۔ کرسیاں خالی پڑی ہونے کے باوجود شمیک بھٹاچاریہ نے ترنمول کے خلاف نعرے لگائے اور تبدیلی کی کال دی۔ دوسری طرف جمعرات کو لال گڑھ میں 'پریورتن سنکلپ یاترا' کا رتھ وقت پر نہ پہنچنے اور بھیڑ کم ہونے کی وجہ سے کارکنوں اور حامیوں میں مایوسی دیکھی گئی۔ مقامی ذرائع کے مطابق، رتھ اپنے مقررہ وقت سے تقریباً پانچ گھنٹے تاخیر سے پہنچا۔ طویل انتظار کے بعد جب رتھ نہیں آیا تو کئی کارکن اور متجسس لوگ مایوس ہو کر گھر لوٹ گئے۔ نتیجے کے طور پر جب دلیپ گھوش لال گڑھ میں خطاب کر رہے تھے، تو وہاں مٹھی بھر لوگ ہی موجود تھے۔ ہاوڑہ کے شیام پور میں اپوزیشن لیڈر شبھیندو ادھیکاری نے کہا کہ یہ انتخاب بنگال کو بچانے کا انتخاب ہے۔ انہوں نے دعویٰ کیا کہ ریاست بھر میں بی جے پی کی لہر چل رہی ہے، لیکن وہ 'طوفانی موجودگی' کہیں نظر نہیں آ رہی۔ ہاوڑہ-ہگلی پریورتن یاترا کے دوسرے دن کا آغاز آمتا کے پاتروپول سے ہونا تھا، جہاں متھن چکرورتی کی آمد متوقع تھی۔ سب کچھ طے تھا، لیکن متھن کے وقت پر نہ پہنچنے سے رنگ میں بھنگ پڑ گیا۔ دوپہر کے بارہ بجنے کو آئے لیکن ان کے نہ آنے پر بی جے پی کی خواتین کارکنوں کا غصہ پھٹ پڑا، یہاں تک کہ جلسہ گاہ میں خواتین کو یہ کہتے سنا گیا کہ "دیدی ہی بہت اچھی ہیں"۔ دھوپ میں طویل انتظار کے بعد خواتین متھن کے آنے سے پہلے ہی میدان چھوڑنے پر مجبور ہو گئیں۔ آخر کار جب بارہ بجے کے بعد متھن چکرورتی پہنچے، تب تک میدان کافی حد تک خالی ہو چکا تھا۔

Source: PC- sangbadpratidin