دیدی نے ای ڈی کو ہرایا، بی جے پی کو پھر ہرائیں گی…کولکاتا میں ممتا بنرجی کی حمایت میں اترے اکھلیش یادو۔

سماجوادی پارٹی کے سربراہ اکھلیش یادو نے بدھ کے روز مغربی بنگال کی وزیراعلیٰ ممتا بنرجی سے کولکاتا میں ملاقات کی اور ترنمول کانگریس پر اپنا بھروسہ ظاہر کیا ہے۔ انہوں نے بی جے پی کو کٹہرے میں کھڑا کرتے ہوئے آئی-پی اے سی (I-PAC) ریڈ معاملے پر سوال اٹھائے ہیں۔ اکھلیش یادو نے کہا کہ مغربی بنگال میں بی جے پی کی لڑائی ہارنے کی لڑائی ہے، یہاں کے عوام دیدی کے ساتھ ہیں۔ یہ لوگ ملک کی سیکولرازم کے ساتھ کھلواڑ کر رہے ہیں۔ مجھے خوشی ہے کہ دیدی نے ای ڈی کو ہرا دیا ہے، بی جے پی پین ڈرائیو کا درد نہیں بھول پا رہی ہے۔ یوپی کے سابق وزیراعلیٰ اکھلیش یادو نے کہا، ’’دیدی نے ای ڈی کو ہرایا ہے، وہ بی جے پی کو بھی ہرائیں گی۔‘‘ انہوں نے پین ڈرائیو پر طنز کرتے ہوئے کہا، ’’بی جے پی ابھی بھی پین ڈرائیو کا درد نہیں بھولی ہے۔‘‘ واضح رہے کہ 8 جنوری کو ای ڈی نے آئی-پی اے سی کے سربراہ پرتیک جین کے گھر اور آفس پر چھاپہ مارا تھا۔ اس سرچ آپریشن کے دوران ترنمول کانگریس کی سربراہ ممتا بنرجی خود دونوں مقامات پر پہنچ گئی تھیں۔ ان کے ہمراہ ریاستی پولیس کے ڈی جی راجیو کمار اور کولکاتا پولیس کمشنر منوج ورما بھی تھے۔ ممتا بنرجی پر الزام لگا کہ انہوں نے آئی-پی اے سی آفس سے کاغذات ای ڈی کے ہاتھوں سے چھین لیے۔ ای ڈی بھی دیدی سے ہار گئی: اکھلیش یادو اس وقت ممتا بنرجی اس سرچ آپریشن کے خلاف کافی سرگرم تھیں۔ انہوں نے الزام لگایا کہ بی جے پی ای ڈی کا استعمال کر کے ترنمول کانگریس کے امیدواروں کی لسٹ ضبط کرنے کی کوشش کر رہی ہے۔ اس لیے ممتا بنرجی اس سے متعلق جانکاری، فائلیں اور پین ڈرائیو لے کر چلی گئیں۔ کولکاتا ایئرپورٹ سے نکلنے کے بعد اکھلیش یادو نے اسی پین ڈرائیو معاملے پر بی جے پی کو آڑے ہاتھوں لیا۔ انہوں نے مزید کہا، ’’بنگال سے انسانیت اور بھائی چارے کا پیغام دیا گیا تھا، وہاں تشدد کی یہ سیاست نہیں چلے گی۔ ای ڈی بھی دیدی سے ہار گئی ہے، بی جے پی پین ڈرائیو کا درد نہیں بھول پائی، اس لیے میں کہہ سکتا ہوں کہ بی جے پی یہاں بھی ہارے گی۔‘‘ بی جے پی پین ڈرائیو کا درد نہیں بھولی اکھلیش یادو نے بنگال اور اتر پردیش میں ایس آئی آر (SIR) کے دوران ووٹر لسٹوں میں ہونے والی بڑی تبدیلیوں پر بھی آواز اٹھائی ہے۔ ان کا کہنا ہے کہ بنگال میں 50 لاکھ سے زیادہ لوگوں کو ڈرافٹ لسٹ سے خارج کر دیا گیا، جبکہ اتر پردیش میں یہ تعداد کروڑوں میں ہے، جس کے خلاف وہ احتجاج کر رہے ہیں۔ سماجوادی پارٹی کے لیڈر نے کہا کہ اگر یہاں ایک کروڑ ووٹر ہٹائے گئے تو اتر پردیش میں 4 کروڑ ووٹر ہٹائے گئے ہیں۔ الیکشن کمیشن ہر جگہ ووٹ کاٹنے کی کوشش کر رہا ہے اور مغربی بنگال بھی اس سے الگ نہیں ہے۔ کمیشن ایک آئینی ادارہ ہے، اسے غیر جانبداری کی ضرورت ہے، لیکن جہاں جہاں بی جے پی ہار رہی ہے، وہاں وہ ووٹ کاٹنے کی سازش کر رہے ہیں۔

Source: PC- sangbadpratidin