’دعاؤں نے مجھے بچا لیا‘، زخمی گووندا کا آڈیو پیغام سامنے آ گیا

اپنی گولی سے زخمی ہونے والے بالی ووڈ کے معروف اداکار و سیاسی رہنما گووندا نے اپنے چاہنے والوں کے لیے آڈیو پیغام جاری کر دیا ہے۔ میڈیا رپورٹس کے مطابق انہوں نے جاری کردہ پیغام میں اپنے مداحوں کی دعاؤں اور نیک تمناؤں کا شکریہ ادا کرتے ہوئے اپنے خیرت سے آگاہ کیا ہے۔ 60 سالہ اداکار کا کہنا ہے کہ ان کے پُرستاروں، والدین اور ان کے گرو کی دعاؤں نے انہیں بچا لیا ہے۔ ان کا کہنا ہے کہ مجھے گولی لگی تھی، لیکن اب اسے نکال لیا گیا ہے، میں ڈاکٹروں اور آپ کی دعاؤں کا شکریہ ادا کرتا ہوں۔ واضح رہے کہ گووندا آج صبح تقریباً 4 بج کر 45 منٹ پر گولی لگنے سے زخمی ہو گئے تھے، وہ ایک شو کے لیے صبح 6 بجے کی فلائٹ سے کولکتہ کے لیے روانہ ہونے والے تھے۔ اداکار شیوسینا کے رہنما ہیں اور حادثے کے وقت گھر پر اکیلے تھے۔ میڈیا کے مطابق گووندا کے منیجر کا کہنا ہے کہ لائسنس یافتہ ریوالور الماری میں رکھنے کے دوران گری اور گولی چل گئی جس سے گووندا کی ٹانگ زخمی ہوگئی۔ پولیس کے مطابق سینئر اداکار نے واقعے سے متعلق کوئی شکایت درج نہیں کرائی ہے، واقعے کے بعد انہیں فوری طور پر گھر کے قریب اسپتال لے جایا گیا جہاں کچھ دیر علاج کے بعد وہ واپس آ گئے۔ میڈیا کے مطابق گووندا کی حالت خطرے سے باہر ہے۔ مداحوں نے واقعے پر تشویش کا اظہار کرتے ہوئے گووندا کے لیے نیک خواہشات کا اظہار کیا ہے۔

Source: social media