ڈی اے کو لے کر سرکاری ملازمین کی تنظیم کا 13 مارچ کو 'کام بند' ہڑتال کا اعلان

کولکاتا4مارچ :مہنگائی الاونس (ڈی اے) کے پرانے بقایاجات کے حوالے سے سپریم کورٹ کی ہدایات کے باوجود ریاستی حکومت کی خاموشی برقرار ہے۔ اس لیے اب ڈی اے کے مطالبے پر سرکاری ملازمین کی تنظیم 'سنگرامہہ جوتھا منچ' نے احتجاجی پروگرام کا اعلان کیا ہے۔ بدھ کے روز تنظیم کی جانب سے بتایا گیا کہ وہ آئندہ 13 مارچ کو ریاست کے تمام سرکاری دفاتر میں ’بند مبارک‘ پروگرام منائیں گے۔ اس دن سرکاری دفاتر میں آنے کے باوجود منچ کے ارکان کوئی کام نہیں کریں گے۔ تنظیم کے رہنماوں نے فیصلہ کیا ہے کہ وہ اسی طرح ریاستی حکومت کے سامنے اپنے ڈی اے کا مطالبہ پیش کریں گے۔ واضح رہے کہ 5 مارچ کو سپریم کورٹ نے مہنگائی الاونس کے پرانے بقایاجات سے متعلق کیس کا فیصلہ سنایا تھا۔ عدالت نے حکم دیا تھا کہ مغربی بنگال حکومت کو سرکاری ملازمین کے پرانے واجب الادا ڈی اے کا 25 فیصد فوری طور پر ادا کرنا ہوگا۔ جسٹس سنجے کرول اور جسٹس منوج مشرا کے بنچ نے 25 فیصد کی فوری ادائیگی کے بعد بقیہ 75 فیصد کی ادائیگی کے طریقہ کار کا ایک خاکہ بھی تیار کیا ہے۔ یہ فیصلہ اگست 2009 سے دسمبر 2019 کے درمیان کے بقایاجات پر لاگو ہوتا ہے۔ یہ فیصلہ مرکز اور ریاست کے ڈی اے کے موجودہ فرق (جو کہ 40 فیصد ہے اور اپریل سے کم ہو کر 36 فیصد رہ جائے گا) پر لاگو نہیں ہوتا۔سپریم کورٹ نے ریٹائرڈ جسٹس اندو ملہوترا کی سربراہی میں ایک کمیٹی تشکیل دی ہے جو ڈی اے کیس کے فیصلے پر صحیح معنوں میں عمل درآمد کرانے میں اہم کردار ادا کرے گی۔ اس کمیٹی میں جھارکھنڈ ہائی کورٹ کے سابق چیف جسٹس ترلوک سنگھ چوہان اور چھتیس گڑھ ہائی کورٹ کے سابق جسٹس گوتم بھادوری کو شامل کیا گیا ہے۔ اس کے علاوہ کمیٹی میں مرکز کے 'کمپٹرولر اینڈ آڈیٹر جنرل' کے ایک اعلیٰ عہدیدار کو بھی رکھا جائے گا۔ سپریم کورٹ نے کمیٹی کی ذمہ داریاں بھی طے کر دی ہیں۔ عدالت کے مطابق کمیٹی کی تین بنیادی ذمہ داریاں ہوں گی:کل کتنی رقم ادا کی جانی ہے اس کا تعین کرنا۔یہ طے کرنا کہ کتنے دنوں میں اور کتنی قسطوں میں رقم دی جائے گی۔یہ جانچنا کہ آیا مقررہ وقفوں پر طے شدہ رقم جاری کی جا رہی ہے یا نہیں۔کمیٹی ریاستی حکومت کے ساتھ مشاورت کے بعد تمام امور طے کرے گی، اور یہ طریقہ کار بقیہ 75 فیصد بقایاجات کے لیے لاگو ہوگا۔

Source: PC- anandabazar