کھانا پکانے والی گیس (ایل پی جی) کی بکنگ کا وقفہ ایک بار پھر بڑھا دیاگیا

کولکاتا10مارچ :جنگ کے ماحول میں مرکزی حکومت نے کھانا پکانے والی گیس (ایل پی جی) کی بکنگ کا وقفہ ایک بار پھر بڑھا دیا ہے۔ اب صارفین 21 دن کے بجائے ہر 25 دن بعد گیس سلنڈر بک کر سکیں گے۔ مرکز کا دعویٰ ہے کہ ایل پی جی کے اضافی ذخیرے کو برقرار رکھنے اور کالابازاری کو روکنے کے لیے یہ فیصلہ لیا گیا ہے۔ مغربی ایشیا میں اسرائیل اور ایران کے درمیان جاری شدید جنگ کے اثرات بھارت میں بھی نظر آنے لگے ہیں۔ اس جنگ کی وجہ سے بھارت میں گھریلو گیس کی قیمتوں میں یکدم 60 روپے کا اضافہ کر دیا گیا ہے، جبکہ قدرتی گیس کی قیمتیں بھی بڑھ گئی ہیں۔ اس اضافے کے بعد، 14.2 کلو گرام والے گھریلو سلنڈر کی قیمت 879 روپے سے بڑھ کر اب 939 روپے ہو گئی ہے اور یہ نئی قیمت نافذ العمل ہو چکی ہے۔اگرچہ مودی حکومت نے پہلے عوام کو یقین دلایا تھا کہ تیل اور گیس کی قیمتیں نہیں بڑھیں گی اور ریفائنریوں کو پیداوار بڑھانے کی ہدایت بھی دی گئی تھی، لیکن عالمی حالات کے پیشِ نظر قیمتوں میں اضافہ ناگزیر ہو گیا۔ اب عام آدمی کے ذہن میں یہی سوالات گردش کر رہے ہیں کہ کیا پیٹرولیم مصنوعات کے ذخائر میں کمی آئے گی یا کالابازاری مزید بڑھے گی؟ اسی صورتحال کو قابو میں رکھنے کے لیے حکومت نے بکنگ کے درمیانی وقفے کو بڑھا کر 25 دن کر دیا ہے۔

Source: PC- sangbadpratidin