کانگریس کے سابق ایم پی ابو ہاشم خان چودھری،نتقال کر گئے

مالدہ کے مشہور و معروف غنی خان چودھری خاندان میں سوگ کی لہر دوڑ گئی ہے۔ سابق کانگریس رکن پارلیمان ابو ہاشم خان چودھری، جنہیں پیار سے 'ڈالو بابو' کہا جاتا تھا، انتقال کر گئے ہیں۔ ابو ہاشم خان چودھری نے بدھ کی رات 9 بج کر 50 منٹ پر کولکتہ کے ایلگن روڈ پر واقع ایک نرسنگ ہوم میں آخری سانس لی۔ ان کی عمر 88 سال تھی۔ وہ طویل عرصے سے بڑھاپے کی بیماریوں اور صحت کے دیگر مسائل میں مبتلا تھے۔ وہ 26 فروری سے نرسنگ ہوم میں زیرِ علاج تھے۔ابو ہاشم خان چودھری مالدہ کے قدآور لیڈر اے بی اے غنی خان چودھری کے بھائی تھے۔وہ مالدہ ضلع کانگریس کے صدر اور طویل عرصے تک رکن پارلیمان رہے۔ انہوں نے اپنے بھائی کی عوامی خدمت کی وراثت کو بخوبی آگے بڑھایا۔ مغربی بنگال پردیش کانگریس کے صدر شبھنکر سرکار نے ان کی وفات پر گہرے دکھ کا اظہار کیا۔ انہوں نے کہا، "ڈالو بابو کا انتقال کانگریس خاندان کے لیے ایک ناقابلِ تلافی نقصان ہے۔ میرا ان کے ساتھ برسوں کا دلی رشتہ تھا، میں نے اپنا ایک مخلص خیر خواہ کھو دیا ہے۔"شبھنکر سرکار نے بتایا کہ جمعرات کی صبح ان کی میت کو مالدہ لے جایا جائے گا۔ میت کو کانگریس کے صوبائی ہیڈ کوارٹر 'ودھان بھون' نہیں لے جایا جائے گا، بلکہ براہِ راست ان کے آبائی علاقے منتقل کیا جائے گا۔ان کی وفات پر مختلف سیاسی جماعتوں کے رہنماوں نے تعزیت کا اظہار کرتے ہوئے اسے بنگال کی سیاست، بالخصوص مالدہ کے لیے ایک بڑے عہد کا خاتمہ قرار دیا ہے۔

Source: PC-sangbadpratidin