کالج اور یونیورسٹی کے اسسٹنٹ پروفیسروں کو پریزائیڈنگ آفیسر مقرر کرنے کا الیکشن کمیشن کا فیصلہ برقرار

کلکتہ ہائی کورٹ کی ڈویڑن بنچ کے حالیہ حکم کے مطابق، کالج اور یونیورسٹی کے اسسٹنٹ پروفیسروں کو پریزائیڈنگ آفیسر کے طور پر مقرر کرنے کا الیکشن کمیشن کا فیصلہ برقرار رہے گا۔ جسٹس شمپا سرکار اور جسٹس اجے کمار گپتا کی ڈویڑن بنچ نے سنگل بنچ کے پچھلے فیصلے پر روک لگا دی ہے۔ اسسٹنٹ پروفیسروں کے ایک حلقے نے پریزائیڈنگ آفیسر کے طور پر اپنی تقرری کی مخالفت کرتے ہوئے عدالت سے رجوع کیا تھا۔ ان کا موقف تھا کہ یہ ذمہ داری ان کے عہدے کے وقار کے مطابق نہیں ہے۔: اس سے قبل جسٹس کرشنا راو کی سنگل بنچ نے کمیشن کے نوٹیفکیشن پر حکمِ امتناع جاری کر دیا تھا۔ عدالت کا کہنا تھا کہ مناسب وجہ بتائے بغیر اسسٹنٹ پروفیسروں کو ایسے انتخابی کاموں میں شامل نہیں کیا جا سکتا۔ الیکشن کمیشن نے سنگل بنچ کے اس فیصلے کو ڈویڑن بنچ میں چیلنج کیا۔ منگل کو سماعت کے بعد ڈویڑن بنچ نے واضح کیا کہ اسسٹنٹ پروفیسروں کو پریزائیڈنگ آفیسر کے طور پر مقرر کیا جا سکتا ہے۔اس فیصلے کے بعد اب آنے والے انتخابات میں اسسٹنٹ پروفیسروں کی انتخابی ڈیوٹی پر تعیناتی کی راہ ہموار ہو گئی ہے۔

Source: PC-sangbadpratidin