جنوبی کولکتہ میں ترنمول کے کئی لیڈروں کے گھروں کی تلاشی۔وزیر اعلیٰ ممتا بنرجی کے قریبی اور بھوانی پور سے ترنمول امیدوار (ممتا بنرجی) کے تجویز کنندہ معراج شاہ کے گھر انکم ٹیکس کے حکام پہنچ گئے ہیں۔ اس واقعے پر حکمراں جماعت ترنمول کانگریس نے سیاسی انتقام کا الزام لگایا ہے۔ممتا بنرجی نے اپنا نامزدگی خط جمع کرواتے وقت بین المذاہب ہم آہنگی کا پیغام دینے کے لیے چار مختلف مذاہب سے تعلق رکھنے والے چار افراد کو اپنا تجویز کنندہ بنایا تھا۔ معراج شاہ ان میں سے ایک ہیں۔ جمعہ کو راس بہاری سے امیدوار اور سبکدوش ہونے والے ایم ایل اے دیباشیش کمار کے گھر اور ان کے سسرال میں انکم ٹیکس کی کارروائی کے دوران ہی ایلگن روڈ پر واقع معراج کے گھر پر بھی آئی ٹی چھاپے کی خبر سامنے آئی۔ ترنمول کانگریس کا الزام ہے کہ بی جے پی سیاسی مفادات کی خاطر ای ڈی اور انکم ٹیکس جیسے اداروں کا استعمال کر رہی ہے اور اس طرح انتخابات جیتنا چاہتی ہے۔