سی ای او دفتر کے سامنےشوبھندو کی 'ہراسانی' کے کیس میں ہائی کورٹ کا بڑا حکم

کولکتہ: سی ای او دفتر کے سامنے اسمبلی میں اپوزیشن لیڈرشوبھندو ادھیکاری کی مبینہ ہراسانی کے معاملے میں کلکتہ ہائی کورٹ نے ایک بڑا حکم دیا ہے۔ چیف جسٹس س جوئے پال کی ڈویڑن بنچ نے حکم دیا ہے کہ گزشتہ 24 فروری کو سی ای او دفتر کے سامنے شبھیندو کی ہراسانی کے الزامات کے حوالے سے پولیس کو رپورٹ دینی ہوگی۔ اس کے ساتھ ہی، اس ہراسانی کے ملزمان کے خلاف کیا کارروائی کی گئی ہے، اس بارے میں بھی آگاہ کرنا ہوگا۔جمعہ کو سماعت کے دوران، شوبھندوکے وکیل نے بالواسطہ طور پر الیکشن کمیشن کے کردار پر بھی سوال اٹھائے۔ ان کا سوال تھا کہ کمیشن نے سی ای او دفتر کے گیٹ کا راستہ بند کر کے احتجاج کرنے کی اجازت کیسے دی، جس پر انہوں نے شکوک و شبہات کا اظہار کیا۔شوبھندوکے وکیل نے مطالبہ کیا کہ عدالت حکم دے کہ اس عمارت کے 200 میٹر کے دائرے میں کسی قسم کا احتجاج یا جلسہ نہ ہو۔ دوسری جانب،شوبھندو کی ہراسانی کے الزامات پر ریاست کے وکیل کا کہنا تھا کہ وہ اس معاملے میں رپورٹ دینا چاہتے ہیں، لیکن 5 مارچ تک کا وقت دیا جائے۔ دونوں فریقین کے دلائل سننے کے بعد، ہائی کورٹ نے فی الحال اسمبلی میں اپوزیشن لیڈر کی سیکیورٹی کو یقینی بنانے کا حکم دیتے ہوئے اگلی سماعت 5 مارچ کے لیے مقرر کر دی ہے۔واضح رہے کہ گزشتہ 24 فروری کو سی ای او دفتر میں داخل ہوتے وقت شوبھندو کو رکاوٹوں کا سامنا کرنا پڑا تھا۔ انہیں گھیر کر احتجاج کیا گیا، یہاں تک کہ جوتے بھی پھینکے گئے۔ اپوزیشن لیڈر کا الزام ہے کہ پولیس موقع پر موجود ہونے کے باوجود کوئی کارروائی نہیں کی۔ اسی سلسلے میں انہوں نے ہائی کورٹ سے رجوع کیا تھا۔ اپوزیشن لیڈر کی سیکیورٹی کے حوالے سے کلکتہ ہائی کورٹ نے پہلے بھی پولیس کو محتاط رہنے کا کہا تھا۔ آج ہائی کورٹ نے ایک بار پھر ہدایت دی کہ اسمبلی میں اپوزیشن لیڈر کی سیکیورٹی کو یقینی بنانا ہوگا۔

Source: PC- tv9bangla