بی جے پی نے ترنمول کا موازنہ جماعتِ اسلامی سے کر دیا

کولکاتا12فروری :بنگلہ دیش میں تیرھویں قومی پارلیمانی انتخابات چھٹ پٹ بدامنی کے درمیان جاری ہیں۔ گوپال گنج اور منشی گنج میں دیسی بموں (کاک ٹیل) کے دھماکوں اور اکا دکا ہلاکتوں کے علاوہ کشیدگی کی بڑی خبریں نہیں ہیں، تاہم جماعتِ اسلامی پر زبردستی بوتھ پر قبضہ کرنے اور بیلٹ پیپر چھیننے جیسے الزامات لگ رہے ہیں۔ مختلف پولنگ اسٹیشنز سے بی این پی اور دیگر جماعتوں کے ایجنٹوں کو ڈرا دھمکا کر نکالنے کی شکایات بھی موصول ہو رہی ہیں۔ خالدہ ضیا کی پارٹی کا الزام ہے کہ جماعتِ اسلامی بنگلہ دیش کے اقتدار پر قبضہ کرنے کے لیے اس قدر بے تاب ہے کہ وہ کسی بھی قیمت پر اپنا مقصد پورا کرنا چاہتی ہے۔ اس صورتحال میں بی جے پی نے جماعتِ اسلامی کا موازنہ ترنمول کانگریس سے کیا ہے۔ ان کا طنز ہے کہ جماعت بالکل ترنمول کے 'سٹائل' میں انتخابات کروا رہی ہے۔ بی جے پی کے اس الزام پر ریاست کے وزیرِ تعلیم براتیا باسو نے ہنستے ہوئے کہا، ”پھر تو وہ یہ بھی کہیں گے کہ (وینزویلا کے صدر) مادورو کے اغوا کے پیچھے بھی ترنمول کا ہاتھ ہے۔“ جمعرات کی دوپہر ترنمول بھون میں دو ریاستی وزراءچندریما بھٹاچاریہ اور براتیا باسو نے میڈیا سے گفتگو کی۔ دونوں نے بی جے پی کے زیرِ اقتدار ریاستوں میں بنگالی تارکِ وطن مزدوروں کے قتل کے واقعات پر آواز اٹھائی۔ حال ہی میں پونے میں محض بنگالی بولنے کی وجہ سے پورولیا کے مزدور سکھین مہاتو کو قتل کر دیا گیا، جس کی لاش بدھ کو برآمد ہوئی۔ اس پر بی جے پی کو آڑے ہاتھوں لیتے ہوئے براتیا نے کہا، ”آپ نے بنگال اور بنگالیوں کے خلاف جنگ چھیڑ دی ہے۔ آپ غریب مزدوروں، آدی واسیوں اور دلت بھائیوں کی زندگیوں کی قدر نہیں کرتے۔ آپ ایسا اس لیے کر رہے ہیں کیونکہ ایک وقت میں بنگال نے آپ پر راج کیا تھا اور رابندر ناتھ ٹیگور، سوامی وویکانند اور سبھاش چندر بوس جیسی شخصیات آپ کی رہنمائی کرتی تھیں۔ آپ کی یہ نفرت اسی احساسِ کمتری کا نتیجہ ہے۔“ جب صحافیوں نے بنگلہ دیشی انتخابات میں ہونے والی تشدد پر بی جے پی کے اس تبصرے کا حوالہ دیا کہ جماعت وہاں ترنمول کے طریقے سے بوتھ لوٹ رہی ہے، تو براتیا باسو نے مسکراتے ہوئے جواب دیا، ”دوسرے ملک کے معاملات پر کچھ کہنا مناسب نہیں، لیکن اگر بی جے پی کو بنگلہ دیش کی جماعتِ اسلامی میں بھی ترنمول نظر آتی ہے، تو دو دن بعد وہ کہیں گے کہ مادورو کے اغوا میں بھی ترنمول ملوث ہے۔“

Source: PC- sangbadpratidin