بدھان بھون میں ہنگامہ، امیدواروں پر عدم اطمینان پر کانگریس کارکنوں میں ہاتھا پائی، ایک کارکن کا سر پھٹ گیا۔

کولکتہ: امیدواروں کے انتخاب پر عدم اطمینان کے باعث ودھان بھون (صوبائی کانگریس ہیڈ کوارٹر) میں زبردست ہنگامہ آرائی اور افراتفری کا ماحول پیدا ہو گیا۔ کانگریس کے مشتعل کارکنوں کے درمیان تلخ کلامی اور ہاتھا پائی ہوئی، جو پولیس کی موجودگی میں دھینگا مشتی تک جا پہنچی۔ مظاہرین "بیرونی امیدواروں" کی منسوخی کا مطالبہ کر رہے تھے۔ اس تصادم کے دوران راڈ لگنے سے ایک کانگریس کارکن کا سر پھٹ گیا، جس کے بعد کارکنوں نے سڑک پر بیٹھ کر نعرے بازی شروع کر دی۔ ابتدائی معلومات کے مطابق، کانگریس کارکنوں کے ایک حلقے نے یوتھ کانگریس لیڈر کاشف رضا پر ہنگامہ آرائی کا الزام لگایا ہے۔ الزام ہے کہ کاشف نے ہی لوگ بھیج کر ودھان بھون میں کارکنوں پر تشدد کروایا۔ بدھ کے روز ودھان بھون میں صورتحال اس حد تک بگڑ گئی کہ خون خرابہ ہوا۔ زاہد حسین نے کاشف رضا کے خلاف سنگین الزامات عائد کیے ہیں۔ واضح رہے کہ زاہد حسین بالی گنج نشست سے ٹکٹ کے دعویدار تھے، لیکن پارٹی نے سومین مترا کے بیٹے روہن مترا کو وہاں سے امیدوار بنایا ہے۔ دو دن قبل بھی تقریباً 10 کارکنوں نے اسی معاملے پر ہیڈ کوارٹر میں احتجاج کیا تھا، لیکن آج اس احتجاج نے پرتشدد شکل اختیار کر لی۔ دونوں گروپوں کے درمیان لڑائی میں ایک خاتون کارکن بے ہوش ہو گئیں، جبکہ خاتون کارکنوں کے ساتھ دست درازی کے الزامات بھی سامنے آئے۔ پولیس کی موجودگی کے باوجود حالات قابو سے باہر رہے اور پولیس کے سامنے ہی دھکم پیل جاری رہی۔ متاثرہ کارکنوں نے سڑک پر بیٹھ کر حملہ آوروں کی گرفتاری کا مطالبہ کیا اور اینٹالی تھانے کی پولیس کے خلاف بھی شدید غصے کا اظہار کیا۔

Source: PC- sangbadpratidin