بھوانی پور میں شدید تناﺅ ، امیت شاہ کو اپنی گاڑی تبدیل کرنی پڑی

کلکتہ کے علاقے بھوانی پور میں اس وقت شدید تناو اور افراتفری کا ماحول پیدا ہو گیا جب بی جے پی امیدوار شبھیندو ادھیکاری کی نامزدگی سے قبل نکالے گئے روڈ شو میں زبردست ہنگامہ آرائی ہوئی۔ یہ واقعہ وزیر اعلیٰ ممتا بنرجی کی رہائش گاہ کے بالکل سامنے پیش آیا، جہاں صورتحال اس قدر بگڑ گئی کہ مرکزی وزیر داخلہ امت شاہ کو اپنی گاڑی تبدیل کرنی پڑی۔ جیسے ہی امت شاہ اور شبھیندو ادھیکاری کا روڈ شو وزیر اعلیٰ کی گلی کے سامنے پہنچا، وہاں موجود ترنمول کانگریس کے کارکنوں نے سیاہ کپڑے اور کالی جھنڈیاں دکھا کر احتجاج شروع کر دیا۔ دونوں جماعتوں کے حامیوں کے درمیان شدید نعرے بازی ہوئی جو دیکھتے ہی دیکھتے ہاتھا پائی اور دھکم پیل میں بدل گئی۔ پولیس کو صورتحال پر قابو پانے کے لیے سخت جدوجہد کرنی پڑی۔عینی شاہدین کے مطابق، جب امت شاہ کا قافلہ آگے بڑھنے لگا تو وہاں جوتے اچھالنے کا واقعہ بھی پیش آیا، جس سے سیکیورٹی حکام میں کھلبلی مچ گئی۔سیکیورٹی وجوہات کی بنا پر، امت شاہ کو اپنی بڑی گاڑی (ٹرک/کھلی گاڑی) سے اترنا پڑا۔ وہ رکن پارلیمنٹ ابھیشیک بنرجی کے گھر کے بالکل سامنے گاڑی سے اترے اور ایک چھوٹی کار میں سوار ہو کر بقیہ راستہ طے کیا۔

Source: PC- sangbadpratidin