دوسرے مرحلے کی ووٹنگ ختم ہوتے ہی بھاٹ پاڑہ ایک بار پھر تشدد کی آگ میں جھلس اٹھا

مغربی بنگال کے دوسرے مرحلے کی ووٹنگ ختم ہوتے ہی بھاٹ پاڑہ ایک بار پھر تشدد کی آگ میں جھلس اٹھا۔ بی جے پی پر ترنمول کانگریس کے مقامی لیڈر پر جان لیوا حملہ کرنے اور فائرنگ کرنے کا سنگین الزام عائد کیا گیا ہے۔بدھ کی رات بھاٹ پاڑہ میونسپلٹی کے وارڈ نمبر 21 میں کشیدگی اس وقت بڑھی جب ترنمول کارکن تاپس داس پولنگ ختم ہونے کے بعد اپنے بوتھ کے باہر کھڑے تھے۔الزام ہے کہ وہاں موجود بی جے پی کارکنوں کے ساتھ ان کی تلخ کلامی ہوئی، جو دیکھتے ہی دیکھتے ہاتھا پائی میں بدل گئی۔ترنمول امیدوار سومناتھ شیام کا دعویٰ ہے کہ جب تاپس داس پر بی جے پی کے حامیوں نے حملہ کیا اور انہوں نے جان بچا کر بھاگنے کی کوشش کی، تو انہیں نشانہ بنا کر دو سے تین راونڈ گولیاں چلائی گئیں۔تاپس داس اس حملے میں شدید زخمی ہوئے ہیں۔ انہیں فوری طور پر مقامی اسپتال لے جایا گیا، لیکن حالت بگڑنے پر انہیں کمرہٹی کے ساگر دتہ اسپتال منتقل کر دیا گیا ہے، جہاں ان کا علاج جاری ہے۔جگتدل سے ترنمول امیدوار سومناتھ شیام نے براہِ راست ارجن سنگھ کے بھتیجے اور بی جے پی کے حامیوں کو اس حملے کا ذمہ دار ٹھہرایا ہے۔ انہوں نے پولیس سے سخت کارروائی کا مطالبہ کیا ہے۔مقامی بی جے پی قیادت نے ان تمام الزامات کو مسترد کر دیا ہے اور اس واقعے میں پارٹی کے ملوث ہونے سے انکار کیا ہے۔ واقعے کی اطلاع ملتے ہی پولیس کی بھاری نفری موقع پر پہنچ گئی۔ علاقے میں ابھی بھی تناو برقرار ہے، جس کے پیش نظر سکیورٹی سخت کر دی گئی ہے۔ پولیس معاملے کی تفتیش کر رہی ہے کہ آیا واقعی فائرنگ ہوئی تھی اور اس کے پیچھے کون لوگ ملوث ہیں۔

Source: PC-sangbadpratidin