چناﺅ کے پیش نظر بنگال میں مرکزی فورس کی آمد شروع

بنگال میں انتخابات کا بگل بج چکا ہے اور کل یعنی جمعہ سے ریاست میں مرکزی فورسز کی آمد شروع ہو رہی ہے۔ سب سے زیادہ مرکزی فورسز مشرقی مدنی پور میں تعینات کی جائیں گی، جبکہ کولکتہ میں مرکزی فورسز کی 10 کمپنیاں تعینات ہوں گی۔ انتخابات سے قبل بنگال میں مجموعی طور پر مرکزی فورسز کی 480 کمپنیاں تعینات کی جائیں گی، جن میں سے مالدہ میں 12 کمپنیوں کے رہنے کا امکان ہے۔واضح رہے کہ 28 فروری کو ریاست میں حتمی ووٹر لسٹ شائع کی جائے گی، اور اس سے پہلے ہی مرکزی فورسز ریاست میں پہنچ جائیں گی۔ ابتدائی طور پر آنے والی 240 کمپنیوں میں سے بیربھوم میں 7 کمپنیاں، پورولیا میں 5 کمپنیاں، کولکتہ میں 12 کمپنیاں، جنوبی دیناج پور میں 12 کمپنیاں، اور جنوبی 24 پرگنہ کے صرف سندر بن علاقے میں 4 کمپنیاں تعینات کی جائیں گی۔ مشرقی مدنی پور میں 14 کمپنیاں ہوں گی، جبکہ باقی تقریباً تمام اضلاع میں کمپنیوں کی تعداد 10 سے کم رہے گی۔ معلوم ہوا ہے کہ فی الحال 240 کمپنیاں بنگال آ رہی ہیں، جس کے بعد اگلے مرحلے میں مزید 40 کمپنیاں اور پھر 200 مزید کمپنیاں آئیں گی۔ مرکزی فورسز کے جوان پہلے ہی بنگال کے لیے ٹرینوں میں سوار ہو چکے ہیں اور پرسوں تک بھی مزید فورسز ریاست میں پہنچیں گی۔ جس دن حتمی ووٹر لسٹ (SIR) شائع ہوگی، اسی دن سے فورسز ریاست میں گشت شروع کر دیں گی۔ عام طور پر مرکزی فورسز کے پہنچنے کے 1 سے 2 دن بعد انہیں مخصوص اضلاع میں تعینات کیا جاتا ہے۔ ووٹرز کا اعتماد بڑھانے کے لیے یہ فورسز روٹ مارچ کریں گی۔ چونکہ ووٹر لسٹ کی اشاعت کے دن کہیں کہیں احتجاج کا خدشہ ہے، اس لیے خیال کیا جا رہا ہے کہ فورسز اس دن بھی نگرانی اور گشت جاری رکھیں گی۔

Source: PC- tv9bangla