’بنگال کی طرف نظر اٹھائی تو پاکستان کو 1971 کی یاد دلادیں گے : راج ناتھ سنگھ

کولکتہ کو اڑانے کی مبینہ دھمکیوں کے معاملے پر وزیراعظم اور وزیر داخلہ کی خاموشی پر مغربی بنگال کی وزیر اعلیٰ ممتا بنرجی کے سوالات کے بعد، بالآخر وزیر دفاع راجناتھ سنگھ نے اس معاملے پر لب کشائی کی ہے۔ منگل کو بیرک پور میں ایک انتخابی جلسے کے دوران راجناتھ سنگھ نے پاکستان کو 1971 کی جنگ یاد دلاتے ہوئے سخت وارننگ دی کہ اگر بنگال کی طرف نظر اٹھائی گئی تو پاکستان کے لاتعداد ٹکڑے ہو جائیں گے۔راجناتھ سنگھ نے کہا کہ پاکستان کو 55 سال پہلے کا واقعہ نہیں بھولنا چاہیے۔ جب انہوں نے بنگال (مشرقی پاکستان) کی طرف میلی آنکھ سے دیکھا تھا، تو اس کے نتیجے میں پاکستان دو حصوں میں تقسیم ہو گیا تھا—ایک پاکستان اور دوسرا بنگلہ دیش۔انہوں نے مزید کہا، ”اگر اب انہوں نے دوبارہ بنگال کی طرف دیکھنے کی جرات کی، تو ان کا کیا حال ہوگا، اس کا مستقبل لکھا جا چکا ہے۔ وقت آنے پر انہیں سمجھ آ جائے گا۔ اس بار ان کے کتنے ٹکڑے ہوں گے، یہ تو خدا ہی جانتا ہے۔“ بیرک پور میں بی جے پی کے روڈ شو کے دوران میڈیا سے بات کرتے ہوئے وزیر دفاع نے واضح کیا کہ ہندوستان اپنی سالمیت پر کسی بھی قسم کا سمجھوتہ نہیں کرے گا۔

Source: PC-sangbadpratidin