باپ کے تیسرے بیٹے کا نام سن کر بڑا بیٹا ہکا بکا رہ گیا

نیو ٹاون25دسمبر: موبائل چوری، گلے کے ہار کی چوری، یہ سب تو آپ نے سنا ہوگا۔ لیکن باپ کی چوری! ایسا بھی ہوتا ہے! مغربی بنگال میں ایس آئی آر (SIR) کے ماحول کے درمیان کولکتہ کے مضافات سے ایک سنگین شکایت سامنے آئی ہے۔ نیو ٹاون میں ایک شخص کو پتہ چلا کہ اس کا ایک اور بھائی بھی ہے۔ راجر ہاٹ نیو ٹاون اسمبلی حلقہ کے بالیر بگان علاقے کے رہائشی فیلارام بسواس، جن کا انتقال 2021 میں ہوا تھا، ان کے بڑے بیٹے اتم بسواس نے اس حوالے سے نیو ٹاون تھانے میں شکایت درج کرائی ہے۔ اتم بسواس کے مطابق، ان کے والد کے چار بچے ہیں—دو بیٹے اور دو بیٹیاں۔ لیکن ووٹر لسٹ کا مسودہ شائع ہونے کے بعد انہیں معلوم ہوا کہ ان کا ایک اور بھائی بھی ہے جس کا نام سورج بسواس ہے۔ سورج نے اپنے والد کے طور پر فیلارام بسواس کا نام درج کرایا ہے۔ الزام ہے کہ سورج دراصل بنگلہ دیشی ہے۔ایس آئی آر کے دوران یہ معلومات سامنے آئیں کہ فیلارام کے تین بیٹے ہیں۔ بڑے بیٹے اتم بسواس کا دعویٰ ہے کہ سورج بسواس نامی نوجوان فیلارام کے گھر کے پاس ہی رہتا تھا اور اسی وجہ سے خاندان کے قریب آگیا تھا۔ اس نے مبینہ طور پر جعلی دستاویزات کا استعمال کرتے ہوئے ووٹر لسٹ میں اپنا نام شامل کرایا۔ اتم کا کہنا ہے کہ ان کے اصل بہن بھائیوں کے نام اتم، رام کرشن، اروجتا اور ریبا بسواس ہیں۔ دوسری طرف، سورج بسواس نے ان تمام الزامات کو مسترد کر دیا ہے۔ ان کا دعویٰ ہے کہ وہ فیلارام کے ہی بیٹے ہیں اور اتم کے ساتھ خاندانی جھگڑے کی وجہ سے ان پر یہ جھوٹے الزامات لگائے جا رہے ہیں۔ بتایا گیا ہے کہ سورج راجر ہاٹ نیو ٹاو¿ن اسمبلی حلقہ کے پارٹ نمبر 119 کے بی جے پی بوتھ صدر ہیں۔

Source: PC- tv9bangla