اینٹی بایوٹک دوا میں کیڑے ملنے کے بعد اسپتال میں ہلچل مچ گئی

اینٹی بایوٹک دوا میں کیڑے ملنے کے بعد اسپتال میں ہلچل مچ گئی گوالیار 16اکتوبر :گوالیار کے موریار سرکاری اسپتال میں بچوں کے لیے دی جانے والی اینٹی بایوٹک دوا ’ایزیتھرومائسین‘ کی ایک شیشی میں کیڑے ملنے کے بعد اسپتال میں ہلچل مچ گئی۔ واقعے کے بعد اسپتال انتظامیہ نے دوا کے پورے اسٹاک پر فوری طور پر پابندی عائد کر دی اور تحقیقات شروع کر دی ہیں۔ والدین میں خوف و تشویش میں اضافہ ہو گیا ہے اور اس واقعے کی سنجیدگی سے جانچ کی جا رہی ہے۔ اس معاملے کی اطلاع ایک والدہ نے دی، جن کے بچے کو اسپتال سے یہ دوا فراہم کی گئی تھی۔ والدہ نے دوا کی شیشی میں کیڑے دیکھ کر اسپتال انتظامیہ کو فوری طور پر بتایا۔ اسپتال کے عملے نے بتایا کہ یہ واقعہ دیکھ کر فوری طور پر انتظامی سطح پر کارروائی کی گئی اور دوا کی تمام 306 شیشیوں کو ضبط کر لیا گیا۔ یہ واقعہ ایسے وقت میں سامنے آیا ہے جب صوبے میں پچھلے مہینے بچوں کی مشکوک موت کے بعد کھانسی کی دوا ’کولڈرِف‘ پر عالمی ادارہ صحت (ڈبلیو ایچ او) نے انتباہ جاری کیا تھا۔ ڈبلیو ایچ او نے ہندوستان میں تیار کی جانے والی 3 کھانسی کی دواوں کو غیر معیاری قرار دیتے ہوئے والدین کو محتاط رہنے کی ہدایت دی۔

Source: Social Media