اسمبلی جعلی دستخط کیس: سی آئی ڈی کی ابھیشیک بنرجی سے ساڑھے آٹھ گھنٹے طویل پوچھ گچھ

کولکاتہ، 14 جون :ترنمول کانگریس کے قومی جنرل سکریٹری ابھیشیک بنرجی سے اتوار کے روز ریاستی اسمبلی میں مبینہ طور پر 'جالی دستخط' کرنے کے کیس میں کرائم انویسٹی گیشن ڈیپارٹمنٹ کے حکام نے تقریباً ساڑھے آٹھ گھنٹے تک طویل اور سخت پوچھ گچھ کی ہے ۔ ابھیشیک بنرجی طویل ترین تفتیش کا سامنا کرنے کے بعد رات تقریباً 8:20 بجے بھوانی بھون میں واقع سی آئی ڈی ہیڈکوارٹر سے باہر نکلے ۔ اسی معاملے میں بیلی گھاٹہ کے ٹی ایم سی ایم ایل اے کُنال گھوش کو بھی طلب کیا گیا تھا، جن سے پہلے الگ سے اور بعد میں تفتیش کے دوران ابھیشیک بنرجی کے سامنے بٹھا کر پوچھ گچھ کی گئی۔ ابھیشیک بنرجی اتوار کی دوپہر اپنے مقررہ وقت سے 17 منٹ پہلے ہی، صبح 11:43 بجے سی آئی ڈی ہیڈکوارٹر پہنچ گئے تھے ۔ ان کی آمد کے پیشِ نظر بھوانی بھون کے اطراف میں سیکیورٹی کے انتہائی سخت انتظامات کیے گئے تھے ، جہاں ریاستی پولیس کے علاوہ مرکزی فورسز اور آر اے ایف (RAF) کی بھاری نفری تعینات تھی۔سی آئی ڈی دفتر سے باہر نکلنے کے بعد صحافیوں سے گفتگو کرتے ہوئے کُنال گھوش نے بتایا کہ انہوں نے تفتیش میں پورا تعاون کیا اور تصدیق کی کہ حکام نے بنرجی کی موجودگی میں ان سے سوال جواب کیے ۔ کُنال گھوش تقریباً 4 گھنٹے کی پوچھ گچھ کے بعد رخصت ہوئے ۔ کیا ہے 'اسمبلی جالی دستخط' کا پورا تنازعہ؟ یہ پورا معاملہ اس خط سے جڑا ہے جو ترنمول کانگریس کی پارلیمانی پارٹی نے اسمبلی میں اپوزیشن لیڈر کے طور پر شوبھن دیو چٹوپادھیائے کی تقرری کے سلسلے میں اسپیکر کو سونپا تھا۔

Source: UNI NEWS