انتظامیہ میں بڑا ردو بدل : 'نبانہ ' نے 124 ڈبلو بی سی ایس افسران کے تبادلوں کا کیا اعلان

کولکاتہ: مغربی بنگال میں اقتدار کی تبدیلی کے بعد ریاستی سیکریٹریٹ نبانہ نے بیوروکریسی میں اب تک کا سب سے بڑا ردوبدل کرتے ہوئے 124 مغربی بنگال سول سروس (ڈبلو بی سی ایس ) افسران کے بڑے پیمانے پر تبادلے کیے ہیں۔ ذرائع کے مطابق، ان افسران کا ایک بڑا حصہ سابقہ ترنمول کانگریس حکومت کے دور میں انتہائی بااثر اور 'خاص نظر' میں تھا، اور ان میں سے کئی افسران سابق وزیر اعلیٰ ممتا بنرجی کے سیکریٹریٹ میں تعینات تھے۔ حکومت کی تبدیلی کے بعد سے ان کی نئی پوسٹنگ کا طویل عرصے سے انتظار کیا جا رہا تھا، جسے اب پبلک کر دیا گیا ہے۔ نبانہ کے پرسنل اینڈ ایڈمنسٹریٹو ریفارمزڈیپارٹمنٹ کی جانب سے جاری کردہ نوٹیفکیشن کے مطابق، ان تمام افسران کو 17 جولائی تک لازمی طور پر اپنے نئے عہدوں کا چارج سنبھالنے کا حکم دیا گیا ہے۔ صرف ریاستی ہیڈکوارٹر ہی نہیں، بلکہ ضلعی انتظامیہ میں بھی بڑے پیمانے پر ردوبدل کیا گیا ہے۔ مشرقی بردوان، شمالی 24 پرگنہ، کوچ بہار، بانکوڑا اور مغربی مدنی پور جیسے اہم اضلاع میں ایڈیشنل ڈسٹرکٹ مجسٹریٹ کے عہدوں پر نئے افسران کو تعینات کیا گیا ہے۔

Source: social media