انتخابی نتائج کے بعد پولیس عہدیداروں کا ‘جے شری رام’ کے نعروں کے ساتھ رقص، ویڈیو وائرل

کولکتہ: مغربی بنگال اسمبلی انتخابات 2026 کے نتائج نے ریاست کی سیاست میں زلزلہ برپا کر دیا ہے۔ بھارتیہ جنتا پارٹی (بی جے پی) نے پہلی بار ریاست میں واضح اکثریت حاصل کر کے ممتا بنرجی کی 15 سالہ حکمرانی کا خاتمہ کر دیا ہے۔ اس جیت کے بعد سوشل میڈیا پر ایک ویڈیو تیزی سے وائرل ہو رہی ہے جس میں مغربی بنگال پولیس کے اہلکار وردی میں جشن مناتے اور نعرے لگاتے نظر آ رہے ہیں۔ بی جے پی لیڈر تجندر پال سنگھ بگا نے سوشل میڈیا پر ایک ویڈیو شیئر کی ہے جس میں پولیس اہلکار ایک تھانے کے باہر خوشی میں ناچ رہے ہیں۔ ویڈیو میں اہلکاروں کو "جے شری رام” اور "ہر ہر مہادیو” کے نعرے لگاتے ہوئے سنا جا سکتا ہے۔ تجندر بگا نے ویڈیو شیئر کرتے ہوئے لکھا: "ٹی ایم سی کے دورِ حکومت سے آزادی کے بعد مغربی بنگال پولیس کا جشن۔” حالیہ اعداد و شمار کے مطابق، بی جے پی نے ریاست کی 294 نشستوں میں سے 200 سے زائد نشستیں جیت کر کلین سویپ کیا ہے۔ دوسری جانب، حکمراں جماعت ترنمول کانگریس صرف 80 کے لگ بھگ نشستوں پر سمٹ کر رہ گئی ہے۔ مغربی بنگال میں اس بڑی تبدیلی کے بعد اب سب کی نظریں بی جے پی کے وزیراعلیٰ کے امیدوار پر لگی ہوئی ہیں، جس کے لیے شوویندو ادھیکاری کا نام سب سے نمایاں ہے۔

Source: social media