امت شاہ کے جلسہ گاہ میں ہی ابھیشیک نے جوابی اجتماع بلا لیا

امت شاہ کے جلسہ گاہ میں ہی ابھیشیک نے جوابی اجتماع بلا لیا کولکاتا3مارچ :مرکزی وزیر داخلہ امت شاہ نے جس میدان میں جلسہ کیا ہے، اب ترنمول کے کل ہند جنرل سکریٹری ابھیشیک بنرجی اسی میدان میں جوابی جلسہ کرنے جا رہے ہیں۔ جنوبی 24 پرگنہ کے متھرا پور تنظیمی ضلع کے رائے دیگھی کے ایک میدان میں پیر کو امت شاہ کا جلسہ ہوا تھا۔ اب ابھیشیک نے اسی میدان میں آنے والے اتوار، 8 مارچ کو جلسہ کرنے کا فیصلہ کیا ہے۔ بی جے پی کی 'پریورتن یاترا' کا باقاعدہ آغاز اتوار کو ہو گیا تھا۔ پیر کو امت شاہ نے رائے دیگھی میں ایک بڑے عوامی جلسے سے خطاب کیا، جس میں انہوں نے ترنمول کانگریس پر سخت تنقید کی۔ اب ابھیشیک اسی مقام پر جوابی کارروائی کے طور پر جلسہ کریں گے۔ 2021 کے اسمبلی انتخابات سے قبل ابھیشیک نے شمالی اور جنوبی بنگال میں امت شاہ سمیت کئی بی جے پی لیڈروں کے جوابی جلسے کیے تھے، تاہم حالیہ عرصے میں یہ اس طرح کا پہلا واقعہ ہے۔ اس سے قبل، 18 جنوری کو وزیراعظم نریند مودی نے سنگور کے 'ٹاٹا میدان' میں جلسہ کیا تھا۔ اس کے 10 دن بعد وزیراعلیٰ ممتا بنرجی نے بھی سنگور میں جلسہ کیا، لیکن ان کے لیے میدان مختلف تھا۔ مودی کے جلسے کے 'جواب' میں ممتا کے جلسے کے لیے ترنمول نے بڑے پیمانے پر تنظیمی تیاریاں کی تھیں اور وہاں کافی بھیڑ بھی جمع ہوئی تھی۔ حالانکہ اپوزیشن کا دعویٰ تھا کہ انتظامی 'دباو¿' کے ذریعے لوگوں کو لایا گیا تھا اور وہ بھیڑ 'رضاکارانہ' نہیں تھی۔ قابل ذکر ہے کہ جس طرح مودی کے جلسے میں لوگوں کے ہاتھوں میں قومی پرچم نظر آئے تھے، سنگور میں ممتا کے جلسے میں بھی ویسا ہی منظر دیکھا گیا تھا۔

Source: Social Media