امیت شاہ سے ملاقات کے بعد دلیپ گھوش اپنے پرانے انداز میں واپس

کولکاتایکم جنوری : بی جے پی کے 'دبنگ' لیڈر دلیپ گھوش ایک بار پھر اپنے پرانے انداز میں نظر آنے والے ہیں۔ سالٹ لیک میں بی جے پی کے دفتر میں ریاستی صدر شمیک بھٹاچاریہ کے ساتھ ان کی ملاقات سے کچھ ایسے ہی اشارے ملے ہیں۔ خبر ہے کہ 13 جنوری کو درگاپور میں سابق اور موجودہ ریاستی صدور مل کر ایک سیاسی جلسہ کریں گے۔ بی جے پی کے ریاستی صدر شمیک بھٹاچاریہ نے کہا کہ "وہ (دلیپ گھوش) گھر بیٹھنے والے انسان نہیں ہیں۔" اسی دوران، مرکزی وزیر صحت جے پی نڈا بھی 8 تاریخ کو ایک سرکاری پروگرام کے لیے ریاست کے دورے پر آ رہے ہیں۔ دلیپ گھوش بنگال بی جے پی کے کامیاب ترین ریاستی صدر رہے ہیں اور اعداد و شمار بھی اسی بات کی گواہی دیتے ہیں۔ ان کے دور میں ہی پارٹی کی جڑیں بنگال میں مضبوط ہوئیں، تاہم بعد میں نئے چہروں کی آمد کے ساتھ ہی ان کا پارٹی سے فاصلہ بڑھ گیا تھا۔ طویل عرصے تک دلیپ گھوش کو پارٹی کے کسی سرکاری پروگرام میں مدعو نہیں کیا گیا اور وہ اپنی سطح پر انفرادی طور پر جلسے کر رہے تھے، جن کا پارٹی سے کوئی تعلق نہیں تھا۔ لیکن اب خبر ہے کہ ریاستی قیادت دلیپ گھوش کے پروگراموں کو باضابطہ منظوری دے رہی ہے۔ جنوری کے آغاز میں بیرک پور اور کوچ بہار میں بھی ان کے جلسے ہونے والے ہیں جنہیں پارٹی کی حمایت حاصل ہے۔ قابلِ ذکر ہے کہ بدھ کے روز بی جے پی کے 'چانکیہ' امت شاہ نے خود دلیپ گھوش کی ناراضگی دور کرنے کے لیے پہل کی تھی۔ اس کے بعد ہی جمعرات کی دوپہر دلیپ گھوش سالٹ لیک میں پارٹی دفتر پہنچے۔ میٹنگ میں شرکت سے قبل انہوں نے کہا، "میں پارٹی میں ہی تھا، ہاں کسی عہدے پر نہیں تھا۔ پارٹی جس طرح چاہے گی میں اسی طرح کام کروں گا۔" سیاسی حلقوں میں یہ بازگشت ہے کہ ریاست میں بی جے پی کے جو پانچ زونز ہیں، ان میں سے ایک کی ذمہ داری دلیپ گھوش کو سونپی جا سکتی ہے، اگرچہ ابھی تک پارٹی کی جانب سے اس پر کوئی باضابطہ ردعمل سامنے نہیں آیا ہے۔

Source: PC- sangbadpratidin