ممتا بنرجی نے 'پروکسی' ڈی جی پی اور چیف سکریٹری بٹھا رکھے ہیں:امیت شاہ

ممتا بنرجی نے 'پروکسی' ڈی جی پی اور چیف سکریٹری بٹھا رکھے ہیں:امیت شاہ کولکتہ:30دسمبر کولکتہ میں اپنی پریس کانفرنس کے دوران مرکزی وزیر داخلہ امت شاہ نے 'دراندازی' کے لفظ پر خصوصی توجہ دی۔ انہوں نے یقین دلایا کہ بی جے پی کے اقتدار میں آنے کے بعد اس بات کو یقینی بنایا جائے گا کہ سرحد سے ایک پرندہ بھی پر نہ مار سکے۔ ان کی تقریر کا بڑا حصہ اسی مسئلے، دہشت گردی اور بدعنوانی پر محیط تھا۔ شاہ نے مختلف معاملات پر ریاستی حکومت کو سخت تنقید کا نشانہ بنایا، جہاں ان کے نشانے پر حکمران جماعت کے صف اول کے قائدین کے ساتھ ساتھ اعلیٰ بیوروکریٹس بھی رہے۔ پریس کانفرنس کے آخری لمحات میں انہوں نے بنگال کے اعلیٰ عہدیداروں کے بارے میں بھی کھل کر بات کی۔ شاہ نے الزام لگایا کہ وزیر اعلیٰ حکومت ہند، دستور اور سپریم کورٹ کی ہدایات کو نظر انداز کرتے ہوئے اپنی مرضی سے انتظامیہ چلاتی ہیں۔ اسی سلسلے میں انہوں نے یہ نکتہ اٹھایا کہ کس طرح ملازمت کی مدت ختم ہونے کے بعد بھی ڈی جی پی اور چیف سکریٹری اپنے عہدوں پر فائز ہیں۔ امت شاہ نے کہا، "سپریم کورٹ کے احکامات کے باوجود وہ حکومت ہند کے قوانین توڑ دیتی ہیں۔ چیف سکریٹری اور ڈی جی پی کے تقرر میں بھی وہ اپنی من مانی کرتی ہیں۔ ریٹائرمنٹ کے بعد بھی پروکسی ڈی جی پی اور پروکسی چیف سکریٹری بٹھانے کا کام کرتی ہیں۔" واضح رہے کہ بنگال کے چیف سکریٹری منوج پنت 25 جون 2025 کو ریٹائر ہونے والے تھے، لیکن وزیر اعلیٰ نے انہیں ذمہ داریوں سے سبکدوش نہیں کیا۔ بلکہ ان کی مدت ملازمت میں 6 ماہ کی توسیع کر کے اسے 31 دسمبر تک کر دیا گیا۔ وہ یکم ستمبر 2024 سے چیف سکریٹری کے فرائض انجام دے رہے ہیں۔ اس سے قبل بنگال کے سابق چیف سکریٹری الاپن بنرجی کو بھی ریٹائرمنٹ کے بعد وزیر اعلیٰ نے اپنا چیف ایڈوائزر مقرر کیا تھا۔ مزید برآں، راجیو کمار طویل عرصے سے ریاستی پولیس کے کارگزار ڈی جی کے طور پر کام کر رہے ہیں۔ وہ جولائی 2024 سے اس عہدے پر فائز ہیں، جبکہ اس سے قبل دسمبر 2023 سے مارچ 2024 تک بھی وہ اسی عہدے پر تھے۔ راجیو کمار وزیر اعلیٰ کے انتہائی قابل اعتماد افسر سمجھے جاتے ہیں۔ سندیش کھالی واقعے اور شیخ شاہجہاں کی گرفتاری سمیت ریاست کی کئی اہم اور بحرانی صورتحال میں انہوں نے اپنی مہارت کا ثبوت دیا ہے۔ ان کی ریٹائرمنٹ کی مدت 31 جنوری 2026 کو ختم ہوگی۔ مستقل ڈی جی کے تقرر پر رسہ کشی جاری ہے؛ ریاست چاہتی تھی کہ راجیو کمار کو ہی مستقل ڈی جی بنایا جائے، لیکن ان کی ریٹائرمنٹ کے وقت کو لے کر معاملہ الجھ گیا۔ اسی پس منظر میں امت شاہ نے بیوروکریٹس کی مدت ملازمت میں توسیع پر طنز کیا۔

Source: Social Media