کولکاتا10جنوری ا: صرف پانچ دنوں کے وقفے کے بعد، مغربی بنگال کی وزیراعلیٰ ممتا بنرجی نے ایک بار پھر ایس آئی آر سماعت کے عمل میں خامیوں کا الزام لگاتے ہوئے چیف الیکشن کمشنر گیانیش کمار کو خط لکھا ہے۔ وزیراعلیٰ نے نوبل انعام یافتہ ماہر اقتصادیات امرتیہ سین، ورلڈ کپ جیتنے والے کرکٹر محمد شامی اور معروف شاعر جوئے گوسوامی کو سماعت کے نوٹس بھیجے جانے کو کمیشن کا ایک غیر انسانی اور غیر حساس اقدام قرار دیا ہے۔ انہوں نے اپنے خط میں واضح کیا کہ جس طریقے سے سماعتیں ہو رہی ہیں وہ غلط ہے اور اس عمل کو فوری طور پر بند کیا جانا چاہیے۔ خط کے آخر میں انہوں نے لکھا، "میں جانتی ہوں کہ شاید آپ اس خط کا جواب نہیں دیں گے، لیکن آپ کو تمام تفصیلات سے آگاہ کرنا میرا فرض ہے۔
خط کے آغاز میں ہی وزیراعلیٰ نے کہا کہ الیکشن کمیشن جس طریقے سے ایس آئی آر کا کام کر رہا ہے، اس سے وہ حیران اور برہم ہیں۔ سماعت کا معاملہ مکمل طور پر ٹیکنالوجی اور محض معلوماتی غلطیوں پر مبنی ہے، جس میں عقلِ سلیم کا استعمال بالکل نہیں کیا جا رہا۔ یہی وجہ ہے کہ امرتیہ سین، جوئے گوسوامی اور محمد شامی جیسی معاشرے کی معزز شخصیات کو بھی سماعت کے نوٹس بھیجے جا رہے ہیں۔ وزیراعلیٰ نے غصے کا اظہار کرتے ہوئے کہا کہ یہ نوٹس بھیجنا حقیقت سے لاعلمی کا نتیجہ ہے اور کمیشن کے یہ کام جمہوری ڈھانچے کو کمزور کر رہے ہیں۔