اب آزاد پنچھی بن کر انڈیا اتحاد کو مضبوط کروں گی‘، بنگال میں ہار کے بعد دہلی کے چیلنج کے لیے ممتا کی تیاری

انتخابات سے قبل ممتا بنرجی نے کہا تھا کہ وہ بنگال جیت کر دہلی فتح کرنے کے لیے نکلیں گی۔ اگرچہ بنگال کے انتخابات کا عوامی مینڈیٹ ان کے خلاف گیا ہے، لیکن ترنمول سپریمو اپنے مقصد سے پیچھے ہٹنے کو تیار نہیں ہیں۔ شکست کے بعد اپنی پہلی ہی پریس کانفرنس میں ممتا بنرجی نے اپنی مستقبل کی حکمت عملی واضح کر دی ہے۔ انہوں نے دو ٹوک الفاظ میں کہا: ”اب میں ایک آزاد پنچھی ہوں۔ اب میں وزیر اعلیٰ نہیں ہوں۔ میں ایک عام کارکن کی طرح انڈیا اتحاد کو مضبوط کروں گی۔“ انتخابی نتائج کے مکمل اعلان سے قبل ہی پیر کے روز 'انڈیا' بلاک کے رہنماوں نے ترنمول سربراہ سے رابطہ کیا تھا۔ اپوزیشن لیڈر راہول گاندھی سمیت دیگر رہنماوں سے ان کی بات چیت ہوئی ہے۔ منگل کو کالی گھاٹ میں صحافیوں سے گفتگو کرتے ہوئے ممتا بنرجی نے بتایا۔سونیا جی نے مجھے فون کیا تھا۔ راہول گاندھی، اروند کیجریوال، ہیمنت سورین، تیجسوی یادو اور اکھلیش یادو سے بھی بات ہوئی ہے۔“ممتا نے پر اعتماد لہجے میں اعلان کیا، ”انڈیا ٹیم میرے ساتھ ہے۔ اب میں ایک چھوٹے سے کارکن کی طرح انڈیا اتحاد کو مضبوط کروں گی۔ یہ ایک بہت طاقتور اتحاد بنے گا۔“ان کے اس بیان سے واضح ہے کہ بنگال کی اقتدار چھن جانے کے بعد اب ممتا بنرجی اپنی پوری توجہ قومی سیاست اور مرکز میں بی جے پی کے خلاف محاذ آرائی پر مرکوز کرنے والی ہیں۔

Source: PC-sangbadpratidin