آخری مرحلے کی پولنگ سے قبل سیاسی ماحول انتہائی کشیدہ ہو گیا ہے

مغربی بنگال میں آخری مرحلے کی پولنگ سے قبل سیاسی ماحول انتہائی کشیدہ ہو گیا ہے۔ بی جے پی کے قومی ترجمان اجے الوک کی جانب سے وزیر اعلیٰ ممتا بنرجی کو مبینہ طور پر 'گولی مارنے' کی دھمکی والے سوشل میڈیا پوسٹ نے ریاست میں نیا طوفان کھڑا کر دیا ہے۔ ترنمول کانگریس نے اس پر سخت ردعمل دیتے ہوئے کہا ہے کہ "4 مئی کو عوام اس کا جواب دیں گے۔" اتر پردیش سے آئے پولیس مبصر اجے پال شرما کی ایک ویڈیو وائرل ہوئی، جس میں وہ پھلتا سے ترنمول امیدوار جہانگیر خان کے گھر کے باہر ان کے اہل خانہ کو سخت لہجے میں دھمکاتے ہوئے نظر آ رہے ہیں۔ انہوں نے کہا، "ایسا علاج کروں گا کہ رو کر بھی فائدہ نہیں ہوگا"۔ بی جے پی آئی ٹی سیل کے سربراہ امت مالویہ نے اس ویڈیو کو شیئر کرتے ہوئے پولیس افسر کی تعریف کی۔امت مالویہ کی پوسٹ پر تبصرہ کرتے ہوئے بی جے پی کے قومی ترجمان اجے الوک نے لکھا: "لاتوں کے بھوت باتوں سے نہیں مانتے۔ انتخابی نتائج آنے تک یہ لوگ کہیں بھاگ نہ جائیں۔ دھمکی دیں گے تو گولی کھانی پڑے گی دیدی۔" انہوں نے اس پوسٹ میں براہ راست ممتا بنرجی کو ٹیگ کیا۔ترنمول رہنما شانتنو سین نے اس پوسٹ کا اسکرین شاٹ شیئر کرتے ہوئے شدید غصے کا اظہار کیا۔

Source: PC-sangbadpratidin