ووٹر سلپ چناﺅ کے ایک دن بعد ملنے پر بی ایل اوکا گھیراﺅ

مالدہ کے چانچول میں ایک انتہائی عجیب و غریب واقعہ سامنے آیا ہے، جہاں ووٹنگ ختم ہونے کے اگلے دن بی ایل او ووٹر سلپ لے کر ووٹر کے گھر پہنچ گیا۔ اس واقعے کے بعد مشتعل دیہاتیوں نے بی ایل او کو کافی دیر تک محبوس رکھا۔چانچول اسمبلی کے سیہی پور گاوں کی رہائشی حسن آرا بیگم (بوتھ نمبر 223) جمعرات کو پہلے مرحلے کی ووٹنگ میں اپنا حق رائے دہی استعمال نہیں کر سکیں۔ ان کا نام ووٹر لسٹ میں موجود تھا، لیکن انہیں ووٹر سلپ نہیں ملی تھی۔جب حسن آرا نے بی ایل او اختر حسین سے سلپ نہ ملنے کی وجہ پوچھی تھی، تو بی ایل او نے مبینہ طور پر یہ کہہ کر ٹال دیا تھا کہ ان کا نام ایس آئی آر لسٹ میں نہیں آیا ہے۔ حیرت انگیز طور پر جمعہ کی صبح بی ایل او وہی ووٹر سلپ لے کر حسن آرا کے گھر پہنچ گیا۔ ووٹنگ گزر جانے کے بعد سلپ ملنے پر اہل خانہ اور دیہاتی آپے سے باہر ہو گئے۔ غصے میں بھرے دیہاتیوں نے بی ایل او کو علاقے میں روک لیا اور گھنٹوں تک احتجاج کیا۔ ان کا الزام ہے کہ بی ایل او کی لاپرواہی کی وجہ سے ایک شہری اپنے جمہوری حق سے محروم رہ گیا۔صورتحال بگڑتی دیکھ کر بی ایل او اختر حسین نے اپنی غلطی تسلیم کر لی۔ ان کا کہنا تھا کہ وہ ناموں کے درمیان الجھ گئے تھے اور راستہ بھول جانے کی وجہ سے وقت پر سلپ نہیں پہنچا سکے۔

Source: PC-sangbadpratidin