ترنمول کے امیدوار پویتراکر پر بی جے پی کے ٹکٹ پر پنچایت چناﺅ لڑنے کا الزام

نندی گرام میں انتخابی معرکہ اس وقت مزید دلچسپ ہو گیا جب اپوزیشن لیڈر اور بی جے پی امیدوار شبھیندو ادھیکاری نے اپنے قریبی حریف اور ترنمول کانگریس کے امیدوار پویترا کر پر ایک سنگین الزام عائد کیا۔ ایک پریس کانفرنس کے دوران شبھیندو ادھیکاری نے دعویٰ کیا کہ پویترا کر بی جے پی کے ٹکٹ پر پنچایت ممبر منتخب ہوئے تھے اور انہوں نے ابھی تک اس عہدے سے استعفیٰ نہیں دیا ہے۔شبھیندو کا کہنا ہے کہ پنچایت کے عہدے سے مستعفی ہوئے بغیر دوسری پارٹی کے ٹکٹ پر اسمبلی الیکشن لڑنا انتخابی ضابطہ اخلاق کی خلاف ورزی ہو سکتی ہے، جس سے ان کی نامزدگی منسوخ ہونے کا خطرہ ہے۔ انہوں نے طنزیہ انداز میں کہا، "ہم اس کی شکایت الیکشن کمیشن سے نہیں کریں گے کیونکہ میں انہیں سیاسی میدان میں شکست دینا چاہتا ہوں۔ اگر ان کی نامزدگی منسوخ ہو گئی تو میں انہیں ہرا نہیں پاوں گا۔" ترنمول امیدوار پویترا کر نے ان الزامات کو مسترد کرتے ہوئے شبھیندو پر جوابی حملہ کیا۔ انہوں نے کہا، "نندی گرام میں ہونے والے تمام مقدمات کے ماسٹر مائنڈ شبھیندو ادھیکاری ہیں۔ وہ ایسے ہی الزامات لگاتے رہیں گے، اسی لیے ہم ان کی مخالفت کر رہے ہیں۔"پویترا کر نے دعویٰ کیا کہ 4 مئی کو انتخابی نتائج تمام سوالات کا جواب دے دیں گے اور شبھیندو کے موجودہ ساتھی بھی درپردہ ترنمول کے لیے کام کر رہے ہیں۔بھارتی آئین اور پنچایت قوانین کے مطابق، اگر کوئی شخص ایک پارٹی کا پنچایت رکن ہوتے ہوئے دوسری پارٹی سے الیکشن لڑتا ہے:اس کا پنچایت کا عہدہ خطرے میں پڑ سکتا ہے اور اسے خارج کیا جا سکتا ہے۔تاہم، اس بنیاد پر اسمبلی یا لوک سبھا کی نامزدگی منسوخ ہونے کے امکانات بہت کم ہوتے ہیں۔نندی گرام، جو کہ 2026 کے انتخابات کا سب سے اہم مرکز مانا جا رہا ہے، وہاں دو سابق دوستوں کے درمیان یہ لڑائی اب قانونی اور اخلاقی بحث کی طرف مڑ گئی ہے۔

Source: PC-sangbadpratidin