ترنمو ل کارکنوں پر ہورہے تشدد کے خلاف ابھیشیک بنرجی نے سخت ناراضگی کا اظہار کیا

اس رپورٹ کے مطابق مغربی بنگال میں اقتدار کی تبدیلی کے بعد ترنمول کانگریس کے کارکنوں پر مبینہ تشدد اور ہلاکتوں کے خلاف پارٹی کے کل ہند جنرل سکریٹری ابھیشیک بنرجی نے سخت غم و غصے کا اظہار کیا ہے۔ابھیشیک بنرجی نے سوشل میڈیا پر دعویٰ کیا کہ بی جے پی کے مبینہ حملوں میں پارٹی کے دو سرگرم کارکنوں، سپت گرام کے سومناتھ آچاریہ اور چاکدہ کے تپن سکدار کو قتل کر دیا گیا ہے۔ انہوں نے الزام لگایا کہ ان واقعات پر پولیس غیر فعال ہے اور عدالت خاموش تماشائی بنی ہوئی ہے۔ ابھیشیک نے سخت لہجے میں کہا کہ متاثرہ خاندانوں کا ایک ہی سوال ہے: "کیا بنگال میں ترنمول کی حمایت کرنے کا مطلب موت کو دعوت دینا ہے؟" ابھیشیک بنرجی نے وزیر اعظم نریندر مودی اور وزیر داخلہ امت شاہ پر بھی تنقید کرتے ہوئے کہا کہ جب بنگال میں تشدد ہو رہا ہے، تب وزیر اعظم غیر ملکی دوروں کی منصوبہ بندی کر رہے ہیں اور وزیر داخلہ ریاست سے غائب ہیں۔چاکدہ میں تپن سکدار نامی شخص کو پیٹ پیٹ کر ہلاک کرنے کا الزام ہے۔ اہل خانہ کا کہنا ہے کہ انہیں ترنمول سے وابستگی کی وجہ سے نشانہ بنایا گیا۔ اس سلسلے میں پولیس نے گووند داس نامی ایک نوجوان کو گرفتار کیا ہے۔

Source: PC-sangbadpratidin