شوبھندو کے پی اے کے قتل میں بین ریاستی گینگ کا ہاتھ بتایا جا ر ہا ہے

مدھم گرام میں شبھیندو ادھیکاری کے قریبی معاون اور سابق ایئر فورس اہلکار چندر ناتھ بھٹاچاریہ کے سنسنی خیز قتل کیس میں بین ریاستی گینگ کے ملوث ہونے کا شبہ ظاہر کیا جا رہا ہے۔ پولیس نے تحقیقات کے دائرے کو وسیع کرتے ہوئے سرحدی علاقوں کے تمام تھانوں کو الرٹ کر دیا ہے۔سی سی ٹی وی فوٹیج کے مطابق، پوری واردات کو محض 50 سیکنڈ کے اندر انجام دیا گیا۔ پولیس کا خیال ہے کہ قاتلوں نے طویل عرصے تک چندر ناتھ کی نقل و حرکت پر نظر رکھی ہوئی تھی اور ریکی کرنے کے بعد ہی حملہ کیا۔ قتل کے انداز سے یہ خدشہ ظاہر کیا جا رہا ہے کہ اس میں دوسری ریاستوں کے پیشہ ور 'شارپ شوٹرز' کا استعمال کیا گیا ہے۔ پولیس نے ایئرپورٹ کے ڈھائی نمبر گیٹ کے قریب کچرے کے ڈھیر سے ایک بائیک برآمد کی ہے، جس کا رجسٹریشن آسانسول (برن پور) کے وبھاس بھٹاچاریہ کے نام پر ہے۔ تاہم، اس پتے پر اب وہ شخص نہیں رہتا۔ حملے میں استعمال ہونے والی کار کا نمبر پلیٹ سلی گوڑی آر ٹی او میں درج ہے، لیکن وہ نمبر فرضی نکلا۔ اصل مالک کی گاڑی ابھی بھی اس کے پاس محفوظ ہے۔پولیس کا اندازہ ہے کہ مقامی مجرموں نے گلیوں اور راستوں کی نشاندہی میں قاتلوں کی مدد کی ہے، کیونکہ واردات کے بعد ملزمان تنگ گلیوں سے فرار ہونے میں کامیاب رہے۔چندر ناتھ کا ڈرائیور بدھ دیب بیرا بھی گولی لگنے سے شدید زخمی ہے اور کولکتہ کے ایک نجی اسپتال میں زندگی اور موت کی جنگ لڑ رہا ہے۔ شبھیندو ادھیکاری نے اسے سیاسی انتقام قرار دیتے ہوئے کہا ہے کہ چندر ناتھ کو صرف اس لیے نشانہ بنایا گیا کیونکہ وہ ان کے انتہائی قریبی معاون تھے۔

Source: PC-sangbadpratidin