شبھیندو کے پی اے کے قتل کے خلاف ریاست بھر میں احتجاج، شاہراہیں بلاک

شبھیندو ادھیکاری کے پرسنل اسسٹنٹ چندر ناتھ رتھ کے قتل کے خلاف مغربی بنگال کے مختلف حصوں میں شدید احتجاجی لہر دوڑ گئی ہے۔ جنوبی 24 پرگنہ کے ڈائمنڈ ہاربر سے لے کر مغربی مدنا پور کے شالبونی تک، بی جے پی کارکنان سڑکوں پر نکل آئے اور ملزمان کی فوری گرفتاری کا مطالبہ کیا۔ بی جے پی کارکنوں نے قومی شاہراہ 117 کو بلاک کر کے احتجاج کیا۔ مظاہرین کا الزام ہے کہ پولیس اصل ملزمان کو بچانے کی کوشش کر رہی ہے۔ اس ناکہ بندی کی وجہ سے سڑک کے دونوں طرف گاڑیوں کی لمبی قطاریں لگ گئیں، جس سے دفتر جانے والوں اور طلبہ کو شدید مشکلات کا سامنا کرنا پڑا۔ پولیس کی مداخلت اور یقین دہانی کے بعد ناکہ بندی ختم کی گئی۔شالبونی کے بھادوتلا علاقے میں صورتحال کافی کشیدہ رہی۔ مظاہرین نے قومی شاہراہ 60 پر ٹائر اور لکڑیاں جلا کر راستہ روک دیا۔ بی جے پی حامیوں نے نعرے بازی کرتے ہوئے قاتلوں کو سخت سزا دینے کا مطالبہ کیا۔ یہاں بھی پولیس نے موقع پر پہنچ کر صورتحال کو قابو میں کیا۔ ریاست میں انتخابات کے نتائج کے بعد سے سیاسی تشدد کے واقعات میں اضافے کی خبریں موصول ہو رہی ہیں۔ اب تک تشدد کے نتیجے میں چار افراد کی ہلاکت کی اطلاع سامنے آچکی ہے۔ بی جے پی حکومت کی حلف برداری سے محض دو دن قبل شبھیندو کے پی اے کا قتل ریاست میں امن و امان کی صورتحال پر بڑے سوالات کھڑے کر رہا ہے۔ اگرچہ شبھیندو ادھیکاری اور شمیک بھٹاچاریہ جیسے سینئر بی جے پی رہنما مسلسل کارکنوں سے امن برقرار رکھنے کی اپیل کر رہے ہیں، لیکن نچلے درجے کے کارکنوں میں اس قتل کے بعد شدید غم و غصہ پایا جاتا ہے۔ بی جے پی قیادت نے پولیس انتظامیہ سے انتخابی تشدد کو روکنے کے لیے فوری اور سخت اقدامات کرنے کی درخواست کی ہے۔

Source: PC-anandabazar