ایم ایل اے پر طالب علم کو بے رحمی سے پیٹنے کا الزام

نادیا: ریاست میں امتحانات کا سیزن جاری ہے، اسی دوران ایک ایم ایل اےپر مبینہ طور پر امتحان کے امیدواروں کو بے رحمی سے پیٹنے کا سنگین الزام عائد ہوا ہے۔ نادیہ کے کریم پور علاقے میں اس واقعے کو لے کر کافی ہنگامہ برپا ہے۔معلوم ہوا ہے کہ ترنمول کانگریس کے ایم ایل اے بملیندو سنہا رائے مروٹیا تھانہ کے بالیا ڈانگا میں ایک پروگرام ختم کر کے واپس لوٹ رہے تھے۔ اسی دوران ہائر سیکنڈری کے چند طلبہ ٹیوشن پڑھ کر گھر واپس جا رہے تھے۔ الزام ہے کہ ایم ایل اے کی گاڑی مسلسل ہارن بجا رہی تھی لیکن طلبہ نے راستہ نہیں دیا۔ اس پر ایم ایل اے گاڑی سے نیچے اتر آئے اور طلبہ کے ساتھ ان کی تکرار ہو گئی۔ الزام ہے کہ اسی دوران طلبہ کو مارا پیٹا گیا۔ جیسے ہی یہ خبر علاقے میں پھیلی، مقامی باشندے غصے میں آگئے اور ایم ایل اے کے گھر کے سامنے جمع ہو کر احتجاج کرنے لگے۔ اطلاع ملنے پر پولیس نے موقع پر پہنچ کر صورتحال پر قابو پایا۔ تاہم، ایم ایل اے نے مار پیٹ کے الزامات کی تردید کرتے ہوئے اسے ایک سیاسی سازش قرار دیا ہے۔ ان کا کہنا ہے کہ "جو الزامات لگائے جا رہے ہیں وہ سراسر جھوٹے ہیں۔ مجھے ہراساں کرنے کے لیے یہ سب جان بوجھ کر کیا گیا ہے۔دوسری طرف، بی جے پی کے ترجمان جگن ناتھ چٹرجی نے کہا کہ "گزشتہ چند سالوں میں ترنمول کے ایم ایل اے اور ایم پی خود کو راجہ سمجھنے لگے ہیں، جن کے سامنے رعایا کو سر جھکا کر کھڑا رہنا چاہیے۔" ترنمول کے ترجمان تنمے گھوش نے کہا کہ "ایم ایل اے کی گاڑی کو راستہ دینا قاعدہ ہے، شاید بچے سمجھ نہیں پائے۔ لیکن اگر الزامات سچ ثابت ہوئے تو پارٹی کارروائی کرے گی۔

Source: PC- tv9bangla