ایس آئی آر سے نام خارج ہونے پر خاتون خانہ کی موت ہوگئی

بنگال میں انتخابی فہرستوں سے نام خارج ہونے کے خوف سے ایک اور موت کا افسوسناک واقعہ سامنے آیا ہے۔ جنوبی 24 پرگنہ کے کیننگ علاقے میں ایک 60 سالہ بزرگ خاتون، امیتری میتی، ووٹر لسٹ سے نام کٹنے کے صدمے سے انتقال کر گئیں۔ متوفی خاتون کیننگ کے تالدی علاقے کی رہنے والی تھیں۔ وہ گھروں میں کام کاج کر کے گزر بسر کرتی تھیں اور اکیلی رہتی تھیں کیونکہ ان کی دونوں بیٹیوں کی شادی ہو چکی تھی۔ پرانی ووٹر لسٹ میں ان کا نام موجود تھا، لیکن حالیہ ایس آئی آر کی ترمیمی فہرست میں ان کے نام کے آگے 'ڈیلیٹڈ' لکھا ہوا پایا گیا۔ مقامی ذرائع کے مطابق، نام کٹنے کے بعد سے ہی وہ شدید تشویش میں مبتلا تھیں۔ انہیں یہ خوف کھائے جا رہا تھا کہ اب اس عمر میں وہ گھر چھوڑ کر کہاں جائیں گی۔ وہ پڑوسیوں کے گھر جا کر اپنی پریشانی بتاتے ہوئے روتی بھی تھیں۔ اسی ذہنی تناو اور خوف کی وجہ سے ان کی طبیعت بگڑتی گئی اور آج اچانک ہارٹ اٹیک (دل کا دورہ) پڑنے سے وہ چل بسیں۔ ریاست میں انتخابی فہرستوں سے لاکھوں ناموں کے اخراج اور 'ڈی ووٹر' بننے کے خوف نے عام شہریوں، خاص طور پر غریب اور تنہا رہنے والے افراد میں شدید بے چینی پیدا کر دی ہے، جس کے نتیجے میں اس طرح کے المناک واقعات رونما ہو رہے ہیں۔

Source: PC- tv9bangla