ایس آئی آر میں نام ڈیلیٹ ہوگیا، احتجاج کرنے پر پولس نے پکڑ لیا

مالدہ کے کالیا چک-2 بلاک آفس میں ججوں کو یرغمال بنانے اور ہنگامہ آرائی کے معاملے میں پولیس نے بڑی کارروائی کی ہے۔ اس واقعے کے سلسلے میں موتھاباڑی سے آئی ایس ایف کے امیدوار مولانا شاہجہاں علی سمیت مزید 17 افراد کو گرفتار کیا گیا ہے۔آئی ایس ایف امیدوار مولانا شاہجہاں علی کو اس واقعے کا کلیدی ملزم قرار دیتے ہوئے گرفتار کیا گیا ہے۔ پولیس نے ہنگامہ آرائی اور ججوں کو محصور کرنے کے الزام میں مزید 17 افراد کو حراست میں لیا ہے۔تمام 18 ملزمان کو جمعرات کے روز مالدہ ضلع عدالت میں پیش کیا گیا۔ بدھ کے روز کالیا چک-2 بلاک آفس میں ووٹر لسٹ کی تصدیق کے کام میں مصروف سات ججوں کو مشتعل ہجوم نے کئی گھنٹوں تک قید کر رکھا تھا۔ان ججوں میں تین خواتین بھی شامل تھیں۔ججوں کو تقریباً ساڑھے سات گھنٹے تک بلاک آفس کے اندر محصور رکھا گیا، جس کے بعد پولیس نے انہیں وہاں سے نکالا۔گرفتاری کے بعد عدالت لے جاتے ہوئے مولانا شاہجہاں علی نے میڈیا کے سامنے اپنی بے گناہی کا دعویٰ کیا۔ان کا کہنا ہے کہ "چونکہ میں آئی ایس ایف کا امیدوار ہوں، اس لیے مجھے جان بوجھ کر پھنسایا جا رہا ہے۔"شاہجہاں علی نے دعویٰ کیا کہ واقعے کے وقت وہ وہاں موجود ہی نہیں تھے، بلکہ ایک مذہبی جلسے میں شریک تھے۔ واپسی کے دوران انہیں گرفتار کیا گیا۔سپریم کورٹ کی سخت سرزنش اور سی بی آئی/این آئی اے سے تحقیقات کی ہدایت کے بعد، مالدہ پولیس اور انتظامیہ پر ملزمان کی جلد گرفتاری کا شدید دباو تھا۔ پولیس اب اس بات کی تفتیش کر رہی ہے کہ اس منظم احتجاج اور ججوں کو نشانہ بنانے کے پیچھے کن سیاسی یا مقامی عناصر کا ہاتھ تھا۔

Source: PC- tv9bangla