ایس آئی آر کے خلاف ہوئے احتجاج کی جانچ کےلئے این آئی اے کی آئی جی میدان میںکود پڑیں

سپریم کورٹ کی ہدایت پر عمل کرتے ہوئے الیکشن کمیشن نے مالدہ واقعے کی تحقیقات قومی تحقیقاتی ایجنسی کے سپرد کر دی ہیں۔ جمعہ کو این آئی اے کی ٹیم کولکتہ ایئرپورٹ پہنچ گئی ہے۔ خود این آئی اے کی آئی جی سونیا سنگھ موتھاباڑی جا رہی ہیں۔ مرکزی فورسز کے جوانوں کے ہمراہ 24 رکنی ٹیم جائے وقوعہ کا دورہ کرے گی، جبکہ ایک چھوٹی ٹیم پہلے ہی موتھاباڑی پہنچ چکی ہے۔ ایس آئی آر سے نام خارج ہونے پر پیدا ہونے والے 'غصے' کی وجہ سے مالدہ کے موتھاباڑی میں ایس آئی آر کے کام پر مامور ججوں کو ہجوم نے محصور کر لیا تھا۔ ان کی حفاظت پر سوالات کھڑے ہوئے اور انتظامیہ کا کردار مشکوک رہا۔ ملک کے چیف جسٹس سوریا کانت نے خود رات 2 بجے تک صورتحال کی اپ ڈیٹ لی۔ ہائی کورٹ کے چیف جسٹس سوجوئے پال کو چیف سکریٹری سے رابطہ کرنے میں دشواری کا سامنا کرنا پڑا۔ کمیشن اور اس کے تحت کام کرنے والے چیف سکریٹری، ڈی جی، ایس پی اور ضلع مجسٹریٹ کو سپریم کورٹ کی شدید سرزنش کا سامنا کرنا پڑا۔ عدالت نے ججوں کے ساتھ بدسلوکی کو براہ راست سپریم کورٹ پر حملہ قرار دیا اور این آئی اے یا سی بی آئی سے تحقیقات کرانے کا حکم دیتے ہوئے رپورٹ براہ راست عدالت عظمیٰ میں جمع کرانے کی ہدایت دی ہے۔

Source: PC-sangbadpratidin