سائیکلو ن مانتھاکے اثر کی وجہ سے بنگال میں بھی بارش جاری! اضلاع میں ڈیزاسٹر الرٹ، کلکتہ میں صبح سے بارش شروع

کلکتہ : طوفان مانتھا آندھرا پردیش کے ساحل سے ٹکرایا ہے۔ یہ ساحل عبور کر کے ریاست میں داخل ہو گیا ہے۔ اور اس طوفان کے اثر کی وجہ سے اکتوبر کے آخر تک بنگال کے مختلف اضلاع میں بھاری بارش کی پیش گوئی کی گئی ہے۔ محکمہ موسمیات نے ایک بار پھر شمالی بنگال میں آفات کی وارننگ جاری کی ہے۔ جمعہ تک جنوبی بنگال میں بکھرے ہوئے موسلادھار بارش کی پیش قیاسی کی گئی ہے۔ کلکتہ میں منگل کی صبح سے آسمان ابر آلود ہے۔منگل کی شام آندھرا پردیش کے ساحل سے ٹکرانے کے بعد طوفان اور بارشوں کی وجہ سے ریاست میں معمولات زندگی درہم برہم ہو گئے۔ ساحلی ضلع کوناسیما میں ایک مکان پر درخت گرنے سے ایک بزرگ خاتون کی موت ہو گئی۔ اسی ضلع میں ناریل کا درخت اکھڑ کر آٹو پر گرنے سے ایک نابالغ اور آٹو ڈرائیور زخمی ہوگیا۔ سمندری طوفامانتھا نے آندھرا پردیش کی پڑوسی ریاست اڈیشہ کے 15 اضلاع کو متاثر کیا ہے۔ماہرین موسمیات کا کہنا ہے کہ سمندری طوفان مانتھا آندھرا پردیش کے ساحل سے ٹکرانے کے بعد اپنی طاقت کھو چکا ہے۔ یہ طاقت کھو سکتا ہے اور چھتیس گڑھ اور بہار کی طرف بڑھ سکتا ہے۔ تاہم اس طوفان کے اثر سے بنگال کے کئی اضلاع میں جمعہ تک بارش کا امکان ہے۔شمالی بنگال چند دن پہلے سیلاب اور لینڈ سلائیڈنگ سے تباہ ہوا تھا۔ اب مانتھا کے اثر سے دوبارہ تیز بارش کا امکان ہے۔ شمالی بنگال میں جمعرات اور جمعہ کو بھاری سے بہت بھاری بارش کا اورنج الرٹ جاری کیا گیا ہے۔ پہاڑیوں میں لینڈ سلائیڈنگ کا خطرہ ہے۔ وہاں کے دریاﺅں میں پانی کی سطح بلند ہو سکتی ہے۔شمالی بنگال کے ساتھ ساتھ جنوبی بنگال کے سبھی اضلاع میں موسلادھار بارش کی پیش گوئی کی گئی ہے۔ 31 تاریخ تک تیز بارش ہوگی۔ اور کارتک کے مہینے میں ہونے والی اس تیز بارش کی وجہ سے پکے ہوئے دھان کے خراب ہونے کا خطرہ ہے۔ آلو کی کاشت میں تاخیر ہو سکتی ہے۔ جس سے پیداوار متاثر ہو سکتی ہے۔ جنوبی 24 پرگنہ میں آج صبح سے بارش شروع ہوگئی ہے۔ تیز ہوائیں بھی چل رہی ہیں۔ ماہی گیروں کو سمندر میں جانے سے منع کر دیا گیا ہے۔ انتظامیہ نے ہر سب ڈویڑن اور بلاک کی سطح پر کنٹرول روم کھولے ہیں اور صورتحال پر نظر رکھے ہوئے ہیں۔ بارش کی وجہ سے نشیبی علاقوں میں پانی جمع ہونے کا خطرہ ہے۔

Source: social media