سرکاری گھر ملنے کے باوجود نصیب نہ ہوا! کچی دیوار گرنے سے ضعیف خاتون کی دردناک موت

بانکڑا کے پاتراسایئر علاقے میں پیش آنے والا یہ واقعہ انتہائی افسوسناک اور دل دہلا دینے والا ہے، جہاں ایک ضعیف خاتون نئے گھر کی تعمیر کے باوجود پرانے گھر کے ملبے تلے دب کر جان کی بازی ہار گئیں۔ بنگلہ آواس یوجنا کے تحت گھر کی رقم ملی، نیا گھر تیار بھی ہو گیا، لیکن ایک ضعیف خاتون اس نئے گھر میں رہنے سے پہلے ہی موت کی آغوش میں چلی گئیں۔ پرانے مٹی کے گھر کی دیوار گرنے سے یہ المناک حادثہ پیش آیا۔متوفی خاتون کی شناخت شوبھا رانی گھوشال کے نام سے ہوئی ہے، جبکہ ان کے شوہر رام پرساد گھوشال ملبے تلے دب کر شدید زخمی ہوئے۔گھوشال خاندان کا مٹی کا گھر کافی بوسیدہ حالت میں تھا، جس کے لیے انہوں نے سرکاری ہاوسنگ اسکیم میں درخواست دی تھی۔ رقم ملنے کے بعد نیا گھر تعمیر ہو چکا تھا، لیکن میاں بیوی اب بھی پرانے گھر میں ہی رہ رہے تھے، جبکہ ان کا بیٹا اور بہو نئے گھر میں منتقل ہو چکے تھے۔جمعہ کی رات تقریباً دو بجے، جب یہ بزرگ جوڑا سو رہا تھا، اچانک مٹی کے گھر کی ایک دیوار ان پر گر گئی۔ شور سن کر مقامی لوگ موقع پر پہنچے اور انہیں نکال کر قریبی ہیلتھ سینٹر لے گئے، جہاں ڈاکٹروں نے شوبھا رانی کو مردہ قرار دے دیا۔ ان کے شوہر کو ابتدائی طبی امداد کے بعد ہسپتال سے فارغ کر دیا گیا ہے۔نیا گھر بن جانے کے باوجود اس میں رہنے کی حسرت لیے رخصت ہونے والی خاتون کی موت نے پورے گاوں کو غمزدہ کر دیا ہے۔ پولیس نے لاش کو پوسٹ مارٹم کے لیے بھیج دیا ہے اور واقعے کی تحقیقات کی جا رہی ہیں۔

Source: PC- sangbadpratidin