سال کے پہلے دن ایک لاکھ سیاحوں نے دیگھا کے جگن ناتھ دھام کا دورہ کیا

کانتھی2جنوری : نئے سال کے پہلے دن دیگھا کے جگن ناتھ دھام میں عقیدت مندوں کا ہجوم امنڈ آیا۔ صرف ایک دن میں ایک لاکھ سے زیادہ زائرین نے یہاں پوجا کی۔ اب تک دیگھا کی پہچان صرف سمندری ساحل اور سیاحت تک محدود تھی، لیکن وزیر اعلیٰ ممتا بنرجی کی پہل پر تعمیر ہونے والے جگن ناتھ دھام نے اس پرانی پہچان میں روحانیت کا ایک نیا پہلو شامل کر دیا ہے۔ اب سمندر کی لہریں نہیں، بلکہ دیگھا کا جگن ناتھ مندر سیاحوں کی توجہ کا اصل مرکز بن گیا ہے۔ سال کے پہلے دن یہاں ہونے والا زبردست رش اس بات کا واضح ثبوت ہے۔ 2026 کو خوش آمدید کہنے کے لیے بدھ کی رات سے ہی اولڈ دیگھا اور نیو دیگھا کی سڑکیں دلفریب روشنیوں سے سج گئی تھیں۔ ہزاروں سیاح موسیقی کی دھنوں پر جھومتے نظر آئے اور دیر رات تک سڑکوں پر جشن کا ماحول رہا۔ رات کے ٹھیک بارہ بجتے ہی نئے سال کا استقبال کرنے کے لیے پورے دیگھا میں آتش بازی کا شاندار مظاہرہ کیا گیا۔ جشن کا یہ سلسلہ ابھی تھما ہی تھا کہ جمعرات کی صبح پانچ بجے سے ہی عقیدت مند جگن ناتھ، بلرام اور سبھدرا کے درشن کے لیے مندر کے سامنے لمبی قطاروں میں کھڑے ہو گئے۔ بہت سے لوگوں نے پہلے سمندر کے ساحل پر سال کا پہلا سورج طلوع ہوتے دیکھا اور سورج کو پرنام کرنے کے فوراً بعد جگن ناتھ مندر کی طرف قدم بڑھا دیے۔

Source: PC- sangbadpratidin