پورولیا میں 'پریورتن یاترا' سے قبل ہنگامہ، بی جے پی ایم ایل اے کی گاڑی پر پتھراو

پورولیا: بھارتیہ جنتا پارٹی (بی جے پی) کے ایم ایل اے بانیشور مہتو اور ان کے حامیوں کی گاڑیوں پر پتھراو کے واقعے سے علاقے میں شدید کشیدگی پھیل گئی ہے۔ یہ واقعہ ایک ایسے وقت میں پیش آیا ہے جب جمعہ کو بی جے پی کی 'پریورتن یاترا' کا رتھ پورولیا پہنچنے والا ہے۔ بلرام پور اسمبلی حلقہ کے رسول ڈی علاقے میں یہ ہنگامہ ہوا۔بی جے پی کارکنان علاقے میں پارٹی کے جھنڈے لگا رہے تھے، جن کے ساتھ ایم ایل اے بانیشور مہتو بھی موجود تھے۔ الزام ہے کہ مقامی لوگوں نے جھنڈے لگانے پر اعتراض کیا اور انہیں روکنے کی کوشش کی۔ دیکھتے ہی دیکھتے دونوں فریقین کے درمیان تلخ کلامی ہوئی جو جلد ہی تصادم میں بدل گئی۔ الزام ہے کہ مقامی لوگوں نے پتھراو شروع کر دیا، جس کے نتیجے میں بی جے پی ایم ایل اے کی گاڑی کو نقصان پہنچا۔اس تصادم میں بی جے پی کے 5 کارکنان زخمی ہوئے ہیں۔امن و امان بحال کرنے کی کوشش کے دوران بلرام پور تھانے کے آئی سی ارنب گہا بھی زخمی ہو گئے۔تمام زخمیوں کو پہلے بانس گڑھ دیہی ہسپتال لے جایا گیا، جہاں سے انہیں دیوین مہتو گورنمنٹ میڈیکل کالج اور ہسپتال منتقل کر دیا گیا ہے۔بی جے پی کا رتھ ہفتہ کی شام بلرام پور پہنچنے والا ہے اور اتوار کو وہاں بڑا پروگرام طے ہے۔ اس واقعے کے بعد بی جے پی کارکنوں میں شدید غصہ پایا جاتا ہے اور انہوں نے اس معاملے کو انجام تک پہنچانے کی دھمکی دی ہے۔ علاقے میں پولیس کی بھاری نفری تعینات کر دی گئی ہے تاکہ مزید کسی ناخوشگوار واقعے سے بچا جا سکے۔

Source: PC- sangbadpratidin